पोखरा महानगरद्वारा गण्डकी प्रदेशलाई १ सय पिपिई हस्तान्तरण

पोखरा महानगरपालिकाले स्वास्थ्यकर्मीलाइ प्रदान गर्नका लागि गण्डकी प्रदेश सरकारलाई व्यक्तिगत सुरक्षा सामग्री (पिपिई) हस्तान्तरण गरेको छ । महानगरले आइतबार गण्डकी प्रदेश सरकारलाई १ सय थान सुरक्षा सामग्री (पिपिई) दिएको हो ।

महानगरका प्रमुख मानबहादुर जिसीले गण्डकी प्रदेशका मुख्यमन्त्री पृथ्वीसुब्बा गुरुङलाई १ सय थान पिपिई हस्तान्तरण गरेका हुन् । मुख्यमन्त्री गुरुङले पिपिई प्रदान गरेकोमा पोखरा महानरपालिकालाई धन्यवाद ज्ञापन गरेको थिए ।

यसअघि पोखरा महानगरपालिकाले पोखरा स्वास्थ्य विज्ञान प्रतिष्ठान अन्तर्रगतको पश्चिमाञ्चल क्षेत्रीय अस्पताललाई समेत १ सय थान पिपिई प्रदान गरेको थियो।

प्रमुख जिसीले शिशुवा अस्पताललाई ४० वटा, मातृशिशु मितेरी अस्पतालमा ४० पिपिई दिने निर्णय भएको जानकारी दिए ।
उनका अनुसार कास्कीका ४ वटै गाउँपालिकालाई पनि १०÷१० वटा पिपिई दिइनेछ । वैशाख २ गते रुपा, मादी, माछापुच्छे« र अन्नपूर्ण गाउँपालिकाका अध्यक्षलाई व्यक्तिगत सुरक्षा सामग्री प्रदान गरिने महानगरपालिकाले बताएको छ ।

व्यवसायीद्वारा महानगरलाई पिपिई प्रदान
सुपर मादी हाइड्रो पावर र पोखरा अटोवेजप्रालिले पोखरा महानगरपालिकालाई व्यक्तिगत सुरक्षा सामग्री प्रदान गरेका छन् ।
सुपर मादी हाइड्रो पावरका कार्यकारी अध्यक्ष पुष्पज्योति ढुंगाना र अटोवेज प्रालिका प्रबन्ध निर्देशक नारायण पौडेलले ५०÷५० थान पिपिई महानगर प्रमुख मानबहादुर जिसीलाई हस्तान्रण गरेका हुन् ।

कोरोना जोखिम बढी रहेको अवस्थामा स्वास्थ्यकर्मीहरुको लागि पिपिई अति आवश्यक भएकाले महानगर मार्फत सहयोग गरिएको उनीहरुले बताए ।

महानगर प्रमुख जिसीले संकटको बेलामा संस्थाले गरेको सहयोग सह्रानीय रहेको भन्दै धन्यवाद दिएका थिए ।