अन्नपूर्ण पदमार्गमा आएकोे हिमपहिरोमा हराएका सातै जनको शब भेटियो

अन्नपूर्ण पदमार्गमा आएकोे हिमपहिरोमा हराएकामध्ये थप २ जनाको शव फेला परेको छ । गत ३ माघ अन्नपूर्ण पदमार्गको हिँकु खोँचमा आएको हिमपहिरोमा हराएकामध्ये २ जना शव फेला परेपछि हराएका सबै सात जनाको शब भेटिएको हो ।

अन्नपूर्ण गाउँपालिका– ११ स्थित अन्नपूर्ण आधार शिविर (एबीसी) जाने पदयात्रा मार्गको हिंकु खोचमा हिउँ पहिरो आउँदा चार कोरियाली पदयात्री र उनीहरुका तीन नेपाली पदयात्री सहित सात जना हिउँमा पुरिएर हराएका थिए।

हराएका अन्य पदयात्रीको शव यसअघि नै भेटिएको थियो । जिल्ला प्रहरी कार्यालय कास्कीका प्रबक्ता एवं डीएसपी राजकुमार केसीले शुक्रबार विहान एक कोरियाली पर्यटक र एक नेपाली मजदूरको शव भेटिएको बताए । उनका अनुसार भेटिएका शब मध्ये एउटा नेपाली पोर्टर छिरिङ भोटेको रहेका छन् ।

यसअघि नेपाली गाइड सरोज परियारको शव गत फागुनमा भेटिएको थियो । अर्का नेपाली पोर्टर मेमबहादुर तामाङको शव यही बैशाख ११ गते भेटिएको थियो भने दुई कोरियालीको शव गत शनिबार र अर्का एक कोरियालीको शव गत सोमबार भेटिएको थियो ।

शव भेटिएका कोरियालीमा ५७ वर्षीय ली मिन सु, ५३ वर्षीया किम सुक जा, ५९ वर्षीय जियोङ पिल बोङ र ३८ वर्षीया चोई ह्यो वन रहेका छन् ।

चार हजार एक सय ३० मिटर उचाईमा रहेको अन्नपूर्ण आधार शिविरको पदयात्रामा हिंडेका पदयात्री, गाइड र पोर्टर भारी हिमपात हुँदा गन्तव्यमा पुग्न नसकी फर्कने क्रममा हिंकु केभ क्षेत्रमा आएको पहिरोमा परेका थिए ।

खोजी तथा उद्धार कार्यमा नेपाली सेना, नेपाल प्रहरी, स्थानीय सेन्चुरी युवा क्लब, ट्रेकिङ एजेन्सिएज एशोसिएशन अफ नेपाल (टान), अन्नपूर्ण संरक्षण क्षेत्र आयोजना र स्थानीय होटल व्यवसायी जुटेका थिए ।