पोखराबाट उपचारका लागि काठमाण्डौं लगिएका एक जनामा कोरोना संक्रमण

अहिले सम्म कोरोना भाइरसको संक्रमण नदेखिएको पोखराका एक जनामा कोरोना संक्रमण पुष्टि भएको छ। पोखराबाट तीन दिन अघि उपचारका लागि काठमाण्डौ लगिएका एक व्यक्तिमा कोरोना संक्रमण पुष्टि भएको हो ।

तीन दिन अघि अकस्मात बिरामी भएका उनलाई पोखराको एक निजि अस्पतालमा उपचार पश्चात थप उपचारका लागि काठमाण्डौ लगिएको थियो ।

काठमाडौंको धुम्बाराहीस्थित ह्याम्स अस्पतालमा उपचाररत ६० वर्षीय एक व्यक्तिमा कोरोना संक्रमण पुष्टि भएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले शुक्रबारको नियमित अपडेटका क्रममा जानकारी दिएका थिए ।

उनमा कोरोना संक्रमण पुष्टि भएपछि मन्त्रालयले अहिले उनको सम्पर्कमा आएका व्यक्तिहरुको कन्ट्याक्ट ट्रेसिङ गर्न शुरु गरिसकेको छ ।