५५४ थपिए, नेपालमा कोरोना संक्रमितको संख्या १२ हजार नाघ्यो

शनिबार एक दिन नेपालमा ५५४ जनामा कोरोना संक्रमण पुष्टी भएको छ ।

यो संगै नेपालमा कोरोना संक्रमितको संख्या १२ हजार नाघेको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार शनिबार मात्र ५५४ जनामा संक्रमण पुष्टि भएसँगै संक्रमितको संख्या १२ हजार तीन सय ९ पुगेको हो ।

शनिबार १२० महिला ४३४ पुरुष गरेर ५५४ जनाको कोरोना रिपोर्ट पोजिटिभ आएका स्वास्थ्य तथा जनसंख्या मन्त्रालयले जनाएको छ । अहिलेसम्म संक्रमितमध्ये एक हजार तीन सय ६९ महिला र १० हजार नौ सय ४० पुरुष छन् ।

स्वास्थ्य मन्त्रालयको तथ्याङ्क अनुसार अब नेपालको ७७ जिल्लामै कोरोना फैलिएको छ । अहिलेसम्म कोरोना नदेखिएको रसुवामा पनि शनिबार पोजेटिभ केस भेटिएको छ ।

अहिलेसम्म कोरोना जित्नेको संख्या २८ सय ४३ पुगेको छ ।शनिबार मात्र १८ महिला र ११८ पुरुष गरेर १३६ जना कोरोना जितेपछि डिस्चार्ज भएका छन् ।

कोरोनाका कारण नेपालमा अहिलेसम्म २८ जनाको मृत्यु भएको छ ।विश्वभरमा कोरोना संक्रमित हुनेको संख्या करोड नजिक पुगेको छ ।

शनिबारसम्म ९९ लाख ३१ हजार ५१४ जना विश्वमा कोरोना संक्रमणमा परेका छन् ।उनीहरमध्ये ४ लाख ९७ हजार ५०६ जनाको मृत्यु भएको छ । ५३ लाख ९९ हजार ८७४ जना निको भएका छन् ।