स्याङ्जाका ३४ संक्रमित निको भएर घर फर्किए

स्याङ्जाको कालिका सामुदायिक अस्पतालमा उपचाररत ३४ जना कोरोना संक्रमित निको भएर एकैदिन घर फर्किएका छन् ।

जिल्लाको हेलुस्थित अस्पतालमा उपचार गराइरहेका ५ पालिकाका ३४ जना शनिबार घर फर्किएको स्वास्थ्य कार्यालय स्याङ्जाका प्रमुख यामप्रसाद शर्माले जानकारी दिए ।

निको हुनेमा गल्याङ नगरपालिकाका १६, वालिङ नगरपालिकाका १०, आँधीखोला गाउँपालिकाका ४, अर्जुनचौपारी गाउँपालिकाका १ र भीरकोट नगरपालिकाका १ जना छन् ।

सामुदायिक अस्पतालमा उपचाररत ४१ संक्रमितको स्वाब परीक्षणका लागि पोखरा पठाइएकोमा ३४ जनाको नेगेटिभ आएपछि घर पठाइएको हो ।

कोरोना भाइरसलाई जितेर आज घर फर्किएकासहित गरेर स्याङ्जामा निको हुनेको संख्या ५५ पुगेको छ । स्याङ्जाको वालिङ र अर्जुनचौपारीका क्रमश ५८ र ५५ वर्षे २ पुरुषको कोरोना संक्रमणपछि मृत्यु भएको छ।