पोखरामा यस वर्ष गाइजात्रा महोत्सव तथा तायमचा प्रतियोगिता नहुने

पोखरामा यस वर्ष गाइजात्रा महोत्सव तथा तायमचा नृत्य प्रतियोगिता नहुने भएको छ ।

कोरोना भाइरसका कारण नेवाः खल कास्कीको आह्वानमा हरेक वर्ष हुने प्रतियोगिता स्थगित गर्नु परेको खलका अध्यक्ष अशोक पालिखले जानकारी दिए ।

हालै नेवाः खल कास्कीले श्रावण २० गते निकालिदै आईरहेको गाईजात्रा नृत्य र महोत्सवलाई पनि स्थगित गरिएको हो ।

साँस्कृतिक परम्पराका रुपमा मनाउदै आएको गाइजात्रा भने घरका परिवार र सिमित व्यक्तिहरु सम्मिलित भई सामाजिक दुरी कायम गरि निकाल्न पनि नेवाः खलले आह्वान गरेको महासचिव सुविन्द्र श्रेष्ठले बताए ।

यसअघि नेवाः खलको आयोजनामा चैत्र ८ गतेका लागि तोकिएको मिस नेवा प्रतियोगिता लकडाउनका कारण स्थगित गरिएको थियो ।

गाइजात्रा विशेषतः वर्षभरि आफन्तजन गुमाउने परिवारका सदस्यकालागि मृतकको सम्झना र श्रद्धा प्रकट गर्न मनाइने गरिन्छ ।

गाइजात्रामा मृतकको परिवारको घरबाट गाई निकालेर नगर तथा मन्दिर परिक्रमा गर्ने प्रचलन रहेको छ ।

डोकोलाई सिंगारेर गाईको प्रतिमा र मृतकको तस्विर राखेर बिभिन्न मुखुण्डोसहितका झाँकी लगायत पनि प्रर्दशन गर्ने गरिन्छ ।

गाइजात्राको दिन मृतकको परिवारले रामायण प्रर्दशन पनि गर्न गर्छन ।