कोरोना संक्रमणबाट ३० वर्षिय युवकको मृत्यु

कोरोना संक्रमणबाट विराटनगरको कोशी अस्पतालमा ३० वर्षीय युवकको मृत्यु भएको छ ।

विराटनगर महानगरपालिका–१५ का ३० वर्षीय गुप्ता थरका पुरुषको कोरोना संक्रमणका कारण मृत्यु भएको हो ।

उच्च ज्वरो र श्वासप्रश्वासमा समस्या देखिएपछि अस्पतालले आइसोलेसनमा भर्ना गरेर उपचार सुरु गरेको थियो ।

तर रिपोर्ट नआउँदै उनको हिजो बेलुका आइसोलेसनमा मृत्यु भएको थियो ।

मृत्युपछि कोरोना जाँच गर्दा रिपोर्ट पोजेटिभ आएको अस्पतालका मेडिकल सुपरिटेण्डेन्ट डाक्टर चुमनलाल दासले जानकारी दिए ।

उनको मृत्यु भएसँगै विराटनगरमा कोरोनाका कारण मृत्युहुनेको संख्या ६ पुगेको छ ।

बिहीबार नै सिरहाका ४० वर्षीय पुरुषको कोशी अस्पतालमा मृत्यु भएको थियो । मृत्यु भएका दुई जनाको शव नेपाली सेनाको शव व्यवस्थापन टोलीले अन्त्येष्टि गर्ने बताइएको छ ।