गण्डकी प्रदेशमा थप २५ जना कोरोना संक्रमीत थपिए, संक्रमितको संख्या १ हजार ९७५

गण्डकी प्रदेशमा थप २५ जनामा कोरोना पुष्टि भएको छ ।

क्षयरोग उपचार केन्द्र र चितवन मेडिकल कलेजमा गरिएको परीक्षणमा ५ जिल्लाका २५ जनामा पोजेटिभ देखिएको हो ।

कोरोना पुष्टि हुनेमा तनहुँका ९, बागलुङका ८, लमजुङका ४, नवलपुरका ३ र पर्वतका १ जना छन् ।

गण्डकी प्रदेशमा स्वास्थ्य निर्देशनालयले दिएको जानकारी अनुसार पर्वतको जलजला गाउँपालिका ४ का ३६ वर्षीय पुरुषमा कोरोना भाइरस संक्रमण पुष्टि भएको छ ।

त्यस्तै बाग्लुङको बाग्लुङ नगरपालिकाका ८ जनालाई कोरोना पुष्टि भएको छ । नगरपालिकाको वडा नम्बर १ का २१ र ३४ वर्षीय पुरुषलाई कोरोना संक्रमण पुष्टि भएको छ ।

वडा नम्बर ३ का १ वर्षीय बालिका सहित १९ र २७ वर्षीय महिला, वडा नम्बर ६ का ३१ वर्षीय पुरुष रहेका छन् । त्यस्तै वडा नम्बर ८ का २४ वर्षीय पुरुषलाई कोरोना पुष्टि भएको छ ।

यस्तै नगरपालिकाको वडा नम्बर १० का २८ वर्षीय पुरुषलाई समेत कोरोना संक्रमण पुष्टि भएको छ ।

लमजुङको बेसीसहर नगरपालिकाका ४ जनालाई कोरोना पुष्टि भएको छ । उनी २२, २६ र ३७ वर्षीय पुरुष हुन् । उनीहरुमध्ये २ जना नेपाली सेना हुन् भने १ जना पालिकामा कार्यरत छन् ।

यस्तै चितवन मेडिकल कलेजमा गरिएको परीक्षणका क्रममा नवलपरासी ब.सु.पू को मध्येबिन्दु नगरपालिकाका २ जना तथा गैडाकोटका २ जना गरेर ४ जना पुरुषलाई कोरोना भाइरस संक्रमण पुष्टि भएको छ ।

तनहुँमा ९ जनालाई कोरोना संक्रमण पुष्टि भएको छ ।

तनहुँको म्याग्दे गाउँपालिका ४ का ३४ र ६२ वर्षीय पुरुष, वडा नम्बर ६ का ५३ र ५८ वर्षीय पुरुष, वडा नम्बर ७ का १ वर्षीय बालक सहित ३५ र ३७ वर्षीय पुरुषलाई कोरोना संक्रमण पुष्टि भएको छ ।

म्याग्दे गाउँपालिका कै ३१ वर्षीय १ महिलामा समेत कोरोना भाइरस संक्रमण पुष्टि भएको निर्देशनालयले जानकारी दिएको छ ।

त्यस्तै तनहुँ कै भानु नगरपालिकाको वडा नम्बर ४ का ५० वर्षीय पुरुषलाई कोरोना संक्रमण पुष्टि भएको छ ।

यो सँगै गण्डकी प्रदेशमा कोरोना संक्रमितको संख्या १ हजार ९ सय ७७ पुगेको छ । संक्रमितहरुलाई सम्वन्धित जिल्लाको आइसोलेसन लैजाने तयारी भइरहेको निर्देशक डा शर्माले बताए।

गण्डकी प्रदेशमा कोरोना संक्रमणका कारण ९ जनाको मृत्यु भएको छ । प्रदेशमा संक्रमण मुक्त भएर १ हजार ६ सय ६५ जना घर फर्किएका छन् ।