पोखरा महानगरका वडा सदस्यसहित ३ जना अपहरण कसुरमा पक्राउ

कास्कीबाट अपहरण तथा शरीर बन्धकसम्बन्धी कसुरका ३ आरोपी पक्राउ परेका छन् ।

पक्राउ पर्नेमा कास्कीको पोखरा महानगरपालिका- २३ भएका ४५ वर्षीय भरतराज भण्डारी, काठमाडौंको कीर्तिपुर नगरपालिका- ४ घर भई हाल कास्की पोखरा महानगरपालिका- २३ बस्ने ४२ वसन्त लामा र कास्की पोखरा महानगरपालिका- २३ कै ४५ वर्षीय टीकाराम भण्डारी रहेका छन् ।

भरतराज पोखरा महानगरपालिका २३ का वडा सदस्य, लामा ठेकेदार र टीकाराम सुपरभाइजर रहेको र तीनै जनालाई बिहीबार पक्राउ गरिएको जिल्ला प्रहरी कार्यालय कास्कीले जनाएको छ ।

प्रहरीले पोखरा महानगरपालिका- २३ बस्ने २९ वर्षीय महादेव सापकोटालाई अपहरण गरेको आरोपमा उनीहरूलाई पक्राउ गरेको हो ।

८ भदौका दिन दिउँसोको २:३० बजेतिर खहरेखोलास्थितमा निर्माणाधीन पुलबाट सापकोटालाई नियन्त्रणमा लिई कुटपिट गरेर मोबाइलसमेत खोसी बा १४ च ८२७९ नम्बरको कारमा राखेर वसन्त लामाको फ्ल्याटमा थुनेको प्रहरीले जनाएको छ ।

जिल्ला प्रहरी कार्यालय तथा वडा प्रहरी कार्यालय बैदामबाट परिचालित प्रहरीको टोलीले पीडित सापकोटाको उद्धार गरेको र घटनामा प्रयोग सेतो रंगको क्रेटा गाडीसहित उनीहरूलाई पक्राउ गरिएको प्रहरील जनाएको छ ।

तीनै जनामाथि अपहरण तथा शरीर बन्धकसम्बन्धी कसूर र संगठित अपराध मुद्दामा हिजोदेखि लागू हुने गरी कास्की जिल्ला अदालतबाट पहिलो पटक ७ म्याद थप गरी अनुसन्धान प्रक्रिया अगाडि बढाइएको प्रहरीले जनाएको छ ।