२४ घण्टामा १४ जना कोरोना संक्रमितको मृत्यु

पछिल्लो २४ घण्टामा १४ जना संक्रमित थपिएको स्वास्थ्य तथा जनसंख्या मन्त्रालयले जनाएको छ ।

मन्त्रालयले आइतबार अपरान्ह गरेको नियमित कोरोन अपडेटमा प्रवक्ता प्राडा जागेश्वर गौतमले दिएको जानकारी अनुसार ४ जना महिला र १० जना पुरुषको मृत्यु भएको छ ।

जसमध्ये सुनसरीका ७४ वर्षीया, बाराका ४७ वर्षीया, महोत्तरीका ६२ वर्षीया र काठमाडौंका ७२ वर्षीया महिला रहेका छन् ।

यसैगरी, सुनसरीका ६० वर्षीय, मोरङका ६२ वर्षीय, महोत्तरीका ३५ र ७० वर्षीय पुरुषको मृत्यु भएको छ ।

यस्तै, रौतहटका ३० वर्षीय, भक्तपुरका ६५ वर्षीय, नवलपरासीका ६२ वर्षीय र रुपन्देहीका ५७ र ६७ वर्षीय पुरुषको पनि संक्रमणबाट मृत्यु भएको प्रवक्ता गौतमले बताए ।

मन्त्रालयले हालसम्म गरेको अपडेट अनुसार जम्मा मृतकको संख्या २२१ पुगेको छ ।

तर, मन्त्रालयको तथ्यांक भन्दा बढी मृत्युका खबर सार्वजनिक भैसकेका छन् ।