आन्तरिक पर्यटकको घुईचो लागेपछि मानुङकोटमा दुई महिना जग्गा किनबेचमा प्रतिबन्ध

व्यास ५ मानुङमा जग्गा किनबेचका लागि दुई महिनासम्म प्रतिबन्ध लगाइएको छ ।

व्यास नगरपालिकाले जग्गा विकास कार्यक्रम अघि बढाउने काम भैरहेको भन्दै गुरुयोजना बनेर काम अघि नबढ्दासम्मका लागि जग्गा किनबेचमा प्रतिबन्ध लगाउने निर्णय गरेको हो ।

मानुङकोटमा आईतबार बसेको नगरपालिकाको कार्यपालिका बैठकले एक महिनाभित्र गुरु योजना तयार पार्ने निर्णय पनि गरेको वडाध्यक्ष एवं नगरपालिकाका प्रवक्ता मोहनकुमार श्रेष्ठले जानकारी दिए ।

पछिल्लो समय मानुङमा मानिस आउन थाले पछि जग्गाको किनबेच बढ्न थालेको थियो ।

स्थानीयले जग्गा बिक्री गर्ने क्रम बढेपछि नगरपालिकाले प्रतिबन्ध नै लगाएर जग्गा विकास गर्न लागेको नगरपालिकाको भनाई छ ।

नगरपालिकाले मानुङमा सार्वजनिक शौचालय बनाउने भएको छ ।

यसैगरी मानुङमा खानेपानीको डिपिआर पनि तयार पार्नेे निर्णय नगरपालिकाले गरेको छ ।