हङकङको एक रेष्टुरेण्टमा आगलागी,बालक सहित ७ नेपालीको मृत्यु

हङकङको याउमातेइमा नेपालीले संचालन गरेको रेष्टुरेन्टमा आगलागी हुँदा सात जना नेपालीको ज्यान गएको छ ।

ज्यान जानेहरुमा एक बालकसहित चार पुरुष र तीन महिला रहेको बताइएको छ ।

तर मृतकहरू दक्षिण एसियाली मुलका नागरिक रहेको प्रहरीलाई उद्धृत गर्दै साउथ चाइना मर्निङ पोष्टले जनाएको छ । हङकङको समय अनुसार गएराति ८ बजे भएको आगलागीमा १३ जना गम्भीर घाइतेलाई प्रहरीले उद्धार गरेको थियो ।

घाइतेमध्ये १० वर्षीय बालकसहित सात जनाको उपचारका क्रममा मृत्यु भएको हो । आगलागीमा १७ जना घाइते भएको र तीमध्ये धेरै नेपाली मुलका नागरिक रहेको जनाएको छ । हङकङमा यो पछिल्लो एक दशकयता भएको सबैभन्दा ठूलो आगलागी भएको प्रहरीले जनाएको छ ।

बर्थ डे पार्टी भइरहेको बेला आगलागी भएको बताइएको छ । हङकङकी प्रमुख कार्यकारी क्यारी लामले याउमातेइमा आगलागीको घटनाबाट दुखी भएको भन्दै घाइतेको उपचार र घटनाको कारण पत्ता लगाउन निर्देशन दिनुभएको छ ।