पोखरामा कोरोना संक्रमण भयावह बन्दै, एकै दिन ७ जनाको मृत्यु

पोखरा क्षेत्रमा कोरोना संक्रमण भयाबह बन्दै गएको छ ।

महान चाड बडादशैं र तिहार सकिएसंगै पोखरामा दिनप्रतिदिन कोरोना संक्रमणबाट मृत्यु हुनेको संख्या समेत बृद्धी भएको छ।

गण्डकी प्रदेशमा शुक्रबार ७ जनाको मृत्यु भएको छ। यो संख्या एकै दिन पोखरामा मृत्यु हुने नयाँ रेकड हो ।

गण्डकी प्रदेश स्वास्थ्य निर्देशनालयले शुक्रबार पोखराका विभिन्न अस्पतालहरुमा उपचारका क्रममा ७ जनाको मृत्यु भएको जनाएको छ।

प्रदेश स्वास्थ्य निर्देशनालयका अनुसार पोखरा महानगरका ६ जना र तनहुँका १ जना गरी पोखरामा उपचाररत ७ संक्रमित पुरुषको मृत्यु भएको हो ।

कार्तिक २९ गते कोरोना संक्रमण पुष्टि भई गण्डकी मेडिकल कलेज पोखरामा उपचाररत पोखरा–२७ का ७१ वर्षीय पुरुषको शुक्रबार बिहान मृत्यु भएको छ।

यस्तै पोखरा–८ का ५४ वर्षीय पुरुषको शुक्रबार विहान मृत्यु भएको छ । उनी कार्तिक २३ गते भर्ना भएका थिए ।

त्यसैगरी मंसिर ३ गते कोरोना संक्रमण पुष्टि भई उपचाररत तनहुँ म्याग्दे गाउँपालिका ५१ वर्षीय पुरुषको शुक्रकार बिहान उपचारकै क्रममा निधन भएको गण्डकी प्रदेश स्वास्थ्य निर्देशनालयका निर्देशक डा. विनोद विन्दु शर्माले जानकारी दिए।

त्यसै गरी पोखरा स्वास्थ्य विज्ञान प्रतिष्ठानमा बिहीबार भर्ना भइ उपचाररत पोखरा–९ का ६८ वर्षीय पुरुषको मृत्यु भएको छ।

त्यसैगरी उपचाररत पोखरा २१ का ७५ वर्षीय पुरुषको समेत मृत्यु भएको छ।

त्यसैगरी पोखरा–१७ का २९ वर्षीय पुरुषको शुक्रबार मध्यान्न मृत्यु भएको छ। उनी शुक्रबार बिहान अस्पताल भर्ना भएका थिए ।

यस्तै पोखरा–१३ का ५५ वर्षीय पुरुषको समेत उपचरका क्रममा निधन भएको पोखरा स्वास्थ्य विज्ञान प्रतिष्ठानका निर्देशक सहप्रा.डा. अर्जुन आचार्यले जानकारी दिए।

यो संगै गण्डकी प्रदेशमा कोरोनाबाट मृत्यु हुनेको संख्या १३८ पुगेको छ ।