पोखरा महानगरले मनलाग्दो गरी पार्किंङ शुल्क उठाउन थालेको भन्दै विरोध

पोखरा महानगरपालिकाका मेयर मानबहादुर जिसीले ठेकेदारलाई मनलाग्दो गरी पार्किङ शुल्क उठाउन स्विकृती दिएको भन्दै पोखरामा विरोध सुरु भएको छ।

स्थानीय चुनावमा घोषणा पत्रमा पोखरालाई स्मार्टसिटी बनाउने भन्दै चर्का भाषण गरेका प्रमुख जिसीले सडकमा पार्किङ शुल्क उठाउन

नपाउने कानुनलाई लत्ताउदै मनलाग्दो हिसाबले घण्टा हिसाबमा चर्को पार्किङमा शुल्क उठाउन पाउनेगरी ठेकेदार कम्पनीलाई स्किृति दिएपछि उनको चर्को आलोचना भएको छ।

जनताबाट निर्वाचित जनप्रतिनिधिले जनताको ढाड सेक्ने गरी चारपाङग्रे सवारीको प्रतिघण्टा २० रुपैयाँ देखि तीस रुपैयाँ सम्मको शुल्क असुल्न पाउने गरी स्विकृति दिएपछि पोखरेली उनी प्रति आक्रोसित भएका हुन् ।

स्थानीयले आफ्नो पसल अगाडी विहान ७ बजेबाट बेलुका ७ बजे सम्म ब्यवसाय बन्द नहुदा सम्म १२ घण्टाको दैनिक २ सय ४० रुपैयाँ पार्किङवापत तिर्न नसकिने भन्दै महानगरको यस निर्णय विरुद्ध सामाजिक सञ्जालमार्फत विरोध गरेका छन् ।

यसैगरी महानगरले पार्किङका सम्बन्धमा बालहट प्रदर्शन गरेको भन्दै जागौं नेपाल राष्ट्रिय अभियान कास्कीले सोमबार पोखरा महानगरपालिका अगाडि विरोध प्रर्दशन गर्दै महानगरपालिकालाई ज्ञापनपत्र बुझाएको छ ।

अभियानले पार्किङ शुल्क व्यवस्थापनको ठेक्का प्रक्रियामा असन्तुष्टि जनाएको छ ।

शुल्क बुझाउने ग्राहकको सवारीको सुरक्षा, शुल्कको मुल्य, शुल्क उठाइने स्थान लगायतका विषयमा ठेक्का प्रकृयामा कुनै सम्बोधन नभएको लगायतका विषयहरूमा अभियानले ध्यानाकर्षण भएको जनाएको छ ।

अभियानले पार्किङ शुल्क मनोमानी ढंगले उठाइएको एवम् अव्यवहारिक रहेको विज्ञप्तिमा उल्लेख गरेको छ ।

अभियानले तत्कालै अव्यवहारिक ठेक्का प्रक्रियालाई खारेज गर्न माग समेत गरेको छ ।

प्रर्दशन तथा कास्की जिल्लाका संयोजक नारायण हरि तिवारीले व्यवस्थित पार्किङको अभाव हुँदा मनोमानी ढंगबाट ठेक्का प्रक्रिया सुरु गरेर शुल्क उठाउन नमिल्ने बताएका छन् ।

उनले नागरिकले पार्किङको शुल्क बुझाइसकेपछि उनीहरुले पाउने सुविधाको ग्यारेन्टी दिन जरुरी रहेको बताए ।

अभियानको ज्ञापनपत्र बुझ्दै महानगर प्रमुख मानबहादुर जिसीले यस विसयमा महानगरको ध्यानाकर्षण भएको बताए ।