संवैधानिक परिषदको बैठकमा सभामुख सापकोटा अनुपस्थित, पुगेन गणपुरक संख्या

नेकपा विवादको असर संवैधानिक परिषदमा देखिएको छ ।

प्रधानमन्त्री केपी शर्मा ओलीले डाकेको संवैधानिक परिषद बैठकमा सभामुख अग्नि सापकोटा अनुपस्थित भएका छन् ।

परिषदका अध्यक्ष ओलीले मंगलबार बिहानका लागि बोलाएको बैठकमा सभामुख सापकोटा अनुपस्थित भएपछि गणपुरक संख्या नपुग्दा बैठकले औपचारिकता पाउन सकेन ।

पर्याप्त गृहकार्य र छलफल नभएको तथा तयारी नपुगेको भन्दै सभामुख सापकोटाले हिजै फोनमार्फत आफू बैठकमा आउन असमर्थ रहेको जानकारी प्रधानमन्त्रीलाई गराएका थिए ।

पार्टीमा छलफल नगरि एकलौटी संवैधानिक अंगहरुमा प्रधानमन्त्री ओलीले नियुक्ति सिफारिस गर्न लागेको भन्दै अर्का अध्यक्ष प्रचण्ड असन्तुष्ट छन् ।

प्रधानमन्त्रीको अध्यक्षतामा रहने संवैधानिक परिषदमा प्रधानन्यायाधीश, सभामुख, राष्ट्रियसभाका अध्यक्ष, प्रतिनिधिसभामा विपक्षी दलका नेता तथा उपसभामुख रहने व्यवस्था छ ।

अध्यक्ष र चारजना सदस्य उपस्थित भए मात्रै गणपुरक संख्या पुग्छ । उपसभामुख नरहेको र सभामुख नगएपछि गणपुरक संख्या पुग्न नसकेको हो ।