पोखराबाट छात्रालाई होटेलमा लगेर परीक्षा दिलाउने तीन शिक्षक पक्राउ

छात्रालाई होटेलमा लगेर परीक्षा दिलाएको आरोपमा पोखरा-१ स्थित राष्ट्रिय माविका तीन शिक्षक पक्राउ परेका छन् ।

पक्राउ पर्नेमा पोखरा महानगरपालिका १८ कास्कीकोट घर भएका प्रधानध्यापक ४८ वर्षीय सूर्य तिवारी, कास्कीको रुपा गाउँपालिका–४

सिद्ध घर भएका शिक्षक ४१ वर्षीय घनश्याम रेग्मी र पोखरा महानगरपालिका २० भलाम घर भएका शिक्षक ४० वर्षीय शिरीषकुमार बस्ताकोटी रहेको जिल्ला प्रहरी कार्यालय कास्कीका प्रवक्ता एवं प्रहरी नायव उपरीक्षक सुवास हमालले बताए ।

कक्षा ११ को ऐच्छिक अंग्रेजी र शैक्षणिक विधि विषयको आंशिक परीक्षाकी परीक्षार्थी एक छात्रालाई परीक्षा केन्द्रभन्दा बाहिर होटेलमा लगेर अमर्यादित रुपमा परीक्षा लिएका कारण उनीहरु पक्राउ परेका हुन् ।

सो विषयमा आवश्यक अनुसन्धान गरी दोषीउपर कारबाही गर्न राष्ट्रिय परीक्षा बोर्ड सानोठिमी, भक्तपुरले माघ २ गते पत्राचार गरेको थियो ।

कास्की प्रहरीले उनीहरुलाई हिरासतमा राखी शिक्षा ऐनअन्तर्गत मुद्दामा आवश्यक अनुसन्धान प्रक्रिया अगाडि बढाएको जनाएको छ ।