प्रतिशोध साँध्न कार्यकाल एकसाता बाँकी रहेका मन्त्री खड्कालाइ बर्खास्त

गण्डकी प्रदेशका मुख्यमन्त्री कृष्णचन्द्र नेपाली पोखरेलले भौतिक पूर्वाधार, शहरी विकास तथा यातायात व्यवस्था मन्त्री कुमार खड्कालाई बर्खास्त गरेका छन । मुख्यमन्त्री पोखरेलले चुनावमा गठबन्धनलाई असहयोग गरेको आरोपमा मन्त्री खड्कालाइ बर्खास्त गरेका हुन ।

प्रदेश सरकारमा रहदा मुख्यमन्त्री पोखरेल र मन्त्री खड्काबीच राम्रो सम्बन्ध थिएन । सरकारमा रहदा राम्रो सम्बन्ध नभएकाले प्रतिशोध लिनकै लागि मुख्यमन्त्री पोखरेलले कार्यकाल सकिन एक हप्तामात्र बाँकी रहेको अवस्थामा चुनावमा गठबन्धनलाई असहयोग गरेको बहानामा खड्कालाइ हटाएको आरोप लागेको छ ।

तत्कालिन मुख्यमन्त्री पृथ्बीसुब्बा गुरुङ नेतृत्वको सरकारले संसदमा बिश्वासको मत लिन नसकेपछि गण्डकीको मुख्यमन्त्री बन्न पोखरेल र खड्का प्रतिस्पर्धी थिए । तर, अन्तिममा पोखरेलले बरिष्ठ नेता रामचन्द्र पौडेलको जोडबलमा मुख्यमन्त्री हात पारेका थिए । प्रदेशको मुख्यमन्त्री कांग्रेसले हात पारेपछि भौतिक पूर्वाधार तथा शहरी बिकासमा सत्ता साझेदार माओवादीले दावी गरेको थियो ।

तर, यसकालागि कुमार खड्काले चट्टानी अडान लिएपछि मुख्यमन्त्री पोखरेललाइ मन्त्रीपरिषद गठन गर्न झण्डै ६ महिना लागेको थियो । उनले चार पटकमा मन्त्रीपरिषदलाइ पूर्णता दिएका थिए ।

खड्काले भौतिक पूर्वाधारमा अडान नछाडेपछि माओवादीले बाध्य भएर अर्थमन्त्रालय लिएको थियो । मन्त्रीपरिषद बनाउनेक्रममा खड्काले लिएको अडान मुख्यमन्त्रीलाइ मनपरेको थिएन ।

तर, एकबर्ष पहिलेको प्रतिशोध साँध्न मुख्यमन्त्री पोखरेलले कार्यकाल एकसाता बाँकी रहेका मन्त्री खड्कालाइ बर्खास्त गरेको आशंका गरिएको छ ।

सरकारका प्रवक्ता समेत रहेका मन्त्री खड्का पछिल्लो समय कास्की २ (ख) मा चुनाव लडेर मुख्यमन्त्री बन्न चाहेका थिए । तर, यस निर्वाचनमा कांग्रेसले उनलाइ टिकट नै दिएन । त्यसपछि उनले गठबन्धनविरुद्ध अभिव्यक्ति दिएको उम्मेदवारलाई सहयोग नगरेको उनी माथि आरोप लगाइएको छ ।

कास्कीको क्षेत्रनं २ ‘ख’ मा अहिले कांग्रेसका विन्दुकुमार थापा उम्मेदवार छन् । थापालाई खड्काले असहयोग गरेको बताइन्छ ।
मुख्यमन्त्री पोखरेलले बिना आधार चुनावमा गठबन्धनलाई असहयोग गरेको आरोप लगाएर मन्त्री खड्कासंग प्रतिशोध साँधेको खड्का निकट स्रोतले बताएको छ ।

यसअघि मुख्यमन्त्री पोखरेलले ऊर्जामन्त्री हरिशरण आचार्यलाई हटाएका थिए । गोरखामा नेकपा एमालेलाई सहयोग गरेको आचार्यमाथि आरोप लगाइएको थियो ।