गण्डकीमा ९ वैशाखमा प्रदेशसभाको अधिबेशन आह्वान

गण्डकीमा वैशाख ९ गतेका लागि प्रदेशसभाको अधिबेशन आह्वान गरिएको छ ।

गत चैत १० गते माओवादी केन्द्रले मुख्यमन्त्रीमा खगराज अधिकारीलाइ दिएको समर्थन फिर्ता लिएपछि अल्पमतमा पर्दा समेत अधिकारीले राजिनामा नदिएकाले नयाँ सरकार गठन प्रक्रिया थाल्नका लागि दलहरुले आग्रहमा प्रदेश प्रमुख पृथ्बीमान गुरुङले बिषेश अधिबेशन आह्वान गरेका हुन् ।

बिहीबार बसेको मन्त्रिपरिषदको बैठकले अधिवेशन बोलाउनका लागि प्रदेश प्रमुख समक्ष सिफारिस गर्ने निर्णय गरेको थियो । मन्त्रिपरिषदको सिफारिसमा प्रदेश प्रमुख गुरुङले नेपालको संविधानको धारा १८३ को उपधारा १ बमोजिम बैशाख ९ गते शनिबार ३ बजेका लागि बैठक आवाहन गरेका हुन् ।

माओवादी केन्द्रले खगराज नेतृत्वको सरकारलाई दिएको समर्थन फिर्ता लिदै चैत्र १० गते नै माओवादीका तर्फबाट मन्त्री बनेका भौतिक पूर्वाधार विकासमन्त्री हरिबहादुर चुमान र उद्योग, पर्यटन, वन तथा वातावरणमन्त्री रेशम जुग्जालीले मुख्यमन्त्री अधिकारी समक्ष राजीनामा दिएकाले प्रदेश सरकार अल्पमतमा परेको थियो ।

विश्वासको मतका लागि १ महिने अवधि बैशाख ९ गते सम्म रहेको छ । मुख्यमन्त्री अधिकारी अल्पमतमा रहेकाले उनले विश्वासको मत लिने प्रक्रियामा नगई राजिनामा दिन आँकलन गरिएको छ ।

गण्डकीको ६० सदस्यीय प्रदेशभामा एमालेका २२ र राप्रपाका २ सांसदको अधिकारीलाइ समर्थन भएकाले उनी अल्पमतमा छन । अधिकारीले माओवादीका ८, राष्ट्रिय प्रजातन्त्र पार्टीका २ र एमालेका २२ सांसदको समर्थनमा गत पुस २५ गते मुख्यमन्त्री बनेका थिए ।

नयाँ सरकार गठनका लागि कांग्रेससंग २७ र माओवादीका ८ सांसद भएकाले अब, कांग्रेस नेतृत्वमा नयाँ सरकार गठन हुने निश्चित छ । सबैभन्दा ठूलो दलको नाताले नेपाली कांग्रेस संसदीय दलका नेता सुरेन्द्र पाण्डे नेतृत्वमा सरकार बन्ने छ ।