पोखराको महेन्द्रपुलमा झण्डा पार्क ; पार्कमा फहराउने छन, १९५ देशका राष्ट्रिय झण्डा

पोखराको महेन्द्रपुलमा अन्तर्राष्ट्रिय झन्डा पार्क निर्माण गरिने भएको छ ।

लायन्स क्लव अन्तराष्ट्रि डिष्ट्रिक ३२५ अन्तरगतका पाँच वटा डिष्ट्रिकको ८५ लाखको आर्थिक लागतमा आकर्षक झण्डा पार्क निर्माण गर्ने तयारी थालिएको हो । पोखरा महानगरपालिकाका प्रमुख धनराज आचार्यले नयाँ वर्ष २०८० को अवसरमा शुक्रवार उक्त पार्कको शिलान्यास गरेका छन ।

पार्कको शिलान्यास समारोहमा बोल्दै प्रमुख आचार्यले चार तहको प्यारा फिट शैलीमा सबै देशको नाम सहितका पिल्लरहरु निर्माण गरेर बिचको सबैभन्दा अग्लो पिल्लरमा नेपालको झन्डा राखिने बताए । उनले भने, ‘पार्क चार तहको प्याराफिट शैलीमा निर्माण गरेर जुन देशको झन्डा राखिने हो, सोही देशको नाम समेत त्यो पिल्लरमा लेखिनेछ । पार्कको बिचमा भने नेपालको सबैभन्दा अग्लो झन्डा रहनेछ ।’

पार्कमा १९५ देखको राष्ट्रिय झण्डा सहित पोखरा महानगरपालिका, लायन्स र एनआरएनएको समेत झन्डा फहराइने प्रमुख आचार्यले बताए ।

उनले पार्कलाई सिकाइको केन्द्रकारूपमा समेत विकास गरिने बताए । उनले भने,‘पार्क निर्माण भएपछि पत्रपत्रिका पढ्ने व्यवस्था पनि मिलाइनेछ । अनलाइनमा पढ्न चाहनेहरूका लागि कम्प्युटरको समेत व्यवस्था हुनेछ । यो केवल रमाइलोका लागि मात्र नभई लर्निङ सेन्टरका रूपमा पनि गरिने छ ।’पार्कमा निशुल्क वाई फाईको समेत ब्यवस्था गरने प्रमुख आचार्यको भनाई छ ।

पोखरामा निर्माण गरिन लागेको झण्डा पार्क अभियानमा सहभागी हुन पाउँदा खुसीलागेको लायन्स क्लबअफ इन्टरनेश्नलका डिस्ट्रिक्ट ३२५ एम का इलेक्ट गभर्नर धनिराम बरालले बताए । उनले झण्डा पार्क निर्माणले पोखराको पर्यटनलाई अन्तर्राष्ट्रिय बजारमा प्रचार प्रसार गर्न महत्वपूर्ण सहयोग पुग्ने विश्वास व्यक्त गरे ।

पार्क निर्माणसंगै दिगो ब्यवस्थापन सहित संरक्षण महत्वपूर्ण हुने भएकाले स्थानीय सरकारले यसको संरक्षकत्व लिनु पर्ने लायन्स क्लब इन्टरनेश्नल डिस्ट्रिक्ट ३२५ जे का गभर्नर धुर्व श्रेष्ठले बताए ।

झन्डा पार्कमा आफ्नो देशको झन्डाको मुनी बसेर फोटो खिच्न पाउँदा कुनै पनि देशको नागरिकले गौरव महसुस गर्ने वातावरणको सृजना हुने लायन्स डिस्ट्रिक्ट एलका गभर्नर राम बहादुर बसेलले बताए ।

पार्कमा संयुक्त राष्ट्रसंघमा आबद्ध १९५ सहित पोखरा महानगरपालिका, लायन्स र एनआरएनको समेत गरी तत्कालका लागि १९७ झन्डाहरू एकै स्थानमा राख्ने गरी डिजाइन गरिएको निर्माणको जिम्मा पाएको कम्पनीले जनाएको छ ।

पार्क निर्माणका लागि लायन्स क्लबअफ इन्टरनेश्नलका डिस्ट्रिक्टहरुले ८५ लाख बराबरको आर्थिक सहयोग प्रदान गर्ने छन् । झन्डा पार्क ४५ दिनमा निर्माण सम्पन्न गर्ने निर्माण कम्पनीले जनाएको छ।

महेन्द्रपुलको अर्को भागमाभने गैर आवासीय नेपाली संघ एनआरएनको सहयोगमा अत्याधुनिक सार्वजनिक शौचालय निर्माण गरिने छ ।