सरकार विहिन गण्डकी ः मुख्यमन्त्रीमा कांग्रेस, माओवादीको हानथाप

गण्डकी प्रदेश सरकार विहिन भएको छ ।

एमालेका नेता खगराज अधिकारीले प्रदेशसभामा विश्वासको मत गुमाएर पदमुक्त भएको तीन दिन बितिसक्दा पनि गण्डकीमा नयाँ सरकार बन्न सकेको छैन ।

शनिबार प्रदेशसभामा अधिकारीले बिश्वासको मत मागेपनि अस्किृत भएकाले उनी अल्पमत परेका छन । अधिकारी अल्पमतमा परेसंगै सत्ता सहयात्री दल कांग्रेस र माओवादीबीच मुख्यमन्त्रीको बिषयमा सहमति जुट्न नसक्दा नयाँ सरकार गठनको प्रक्रिया सुरु हुन सकेको छैन ।

कांग्रेस र माओवादीबीच आलोपालो मुख्यमन्त्री बन्ने विषयमा सहमति नजुट्दा प्रदेश प्रमुख पृथ्बीमान गुरुङले चालु अधिबेशन नै अन्त्य गरिदिएका छन । उनले अर्को अधिबेशन कांग्रेस र माओवादीबीच सत्ताको भागबण्डा मिलेपछि मात्र नयाँ सरकार गठनका लागि आह्वान गर्ने भएका छन ।

केन्द्रमा प्रदेशहरुमा आलोपालो मुख्यमन्त्री बन्ने कांग्रेस र माओवादीबीच समझदारी भए पनि पहिला कसको नेतृत्वमा सरकार बनाउने भन्ने विषयमा श्रीषनेताबीच छलफल नभएकाले गण्डकीमा सरकार गठन प्रक्रिया पेचिलो बनेको हो ।

संविधानको धारा १६८ को उपधारा २ बमोजिम मुख्यमन्त्री बनेका अधिकारीले विश्वासको मत गुमाएपछि अबको सरकार कसरी गठन हुने भन्ने पनि अन्योल देखिएको छ । संविधानको धारा १६८ को उपधारा २ या उपधारा ३ अनुसार सरकार गठन हुने भन्ने पनि अझै टुंगो लागेको छैन ।

उपधारा २ मा दुई या सोभन्दा बढी दलको बहुमतको सरकार र उपधारा ३ मा सबैभन्दा ठूलो दलको नेतृत्वमा सरकार गठन गर्न सकिने व्यवस्था छ ।

गण्डकीमा पहिलो कार्यकाल आफ्नै नेतृत्वमा सरकार बनाउनका लागि कांग्रेस संसदीय दलका नेता सुरेन्द्रराज पाण्डे काठमाडौं गएका छन् । उनले पार्टी सभापति शेरबहादुर देउवा र प्रधानमन्त्री पुष्पकमल दाहाल प्रचण्डलाई दवाब दिन केही सांसदलाइ काठमाडौं डाकेको छन ।

कांग्रेस संसदिय दलका नेता समेत रहेका पाण्डेले पहिलो चरणमा माओवादीलाई मुख्यमन्त्री दिने संकेत पाएपछि कांग्रेसी सांसदलाइ काठमाडौं बोलाएर दबाव दिन लागेका हुन ।

६० सदस्यीय गण्डकी प्रदेशसभामा कांग्रेसको २७, एमाले २२, माओवादी केन्द्र सभामुख सहित ८, राप्रपा २ र स्वतन्त्रबाट निर्वाचित भएर पछि एकिकृत समाजवादीमा प्रवेश गरेका राजिब (दीपक) मनाङे रहेका छन ।