नक्कली शरणार्थी प्रकरण : २३ करोड ठगिएको भन्दै १०६ जनाले दिए उजुरी

नक्कली शरणार्थी बनाएर अमेरिका पठाउने भन्दै करोडौँ रकम असुली प्रकरणमा प्रहरीले हालसम्म आठ जनालाई पक्राउ गरी अनुसन्धानको दायरामा ल्याएको छ।

अझै केही व्यक्तिमाथि पक्राउ पुर्जी जारी भएको र उनीहरूको खोजी भइरहेको प्रहरीको बताएको छ ।

हालसम्म गिरोहले २३ करोड २५ लाख ठगी गरेको भन्दै १०६ जनाले २० वटा उजुरी दिएका छन्।

पीडितहरु योभन्दा धेरै संख्यामा भएको अनुमान गरिए पनि अन्य व्यक्ति सम्पर्कमा आई सकेका छैनन । उजुरीमा उल्लेख भएका व्यक्तिमाथि अहिले अनुसन्धान जारी रहेको प्रहरीको भनाइ छ।

गिरोहले विसं २०७७ देखि नक्कली शरणार्थी बनाइ ठगी अभियान चलाएको खुलेको छ। यस सम्बन्धमा पहिलो पटक गत जेठमा अपराध अनुसन्धान कार्यालयमा उजुरी परेको थियो।

घटनामा मुख्य आरोपी मानिएका केशव दुलाल, सानु भण्डारी र टंक गुरुङ झन्डै १० महिनापछि गत चैत १२ गते पक्राउ परेका थिए।

त्यसको केही दिनपछि सन्देश शर्मा पोखरेल र सागर थुलुङ पक्राउ परेका थिए।