२१ सय शुल्क तिर्न नसक्दा बिद्यालयले प्रबेशपत्र नदिएकाले विद्यार्थीले गरे आत्महत्या

परिक्षा शुल्क तिर्ने रकम जोहो गर्न नसक्दा धादिङका एक विधार्थीले आत्महत्या गरेका छन ।

धादिङकको ज्वालामुखि गाउँपालिका ७ चैनपुरस्थित सालबास माध्यमिक विद्यालय कक्षा १२ मा अध्ययनरत एक विद्यार्थीले परिक्षा शुल्क तिर्न नसक्दा आत्महत्या गरेका छन् ।

चैनपुर ७ कै १९ वर्षिय जित बहादुर बयलकोटीले आर्थिक अभावले कक्षा १२ को परिक्षा शुल्क तिर्ने रकम जोहो गर्न नसक्दा आत्महत्या गरेको परिवारले जनाएको छ ।

कक्षा १२ को वार्षिक परीक्षाका लागि विद्यालयले प्रवेशपत्र नदिएकै कारण छोराले आत्महत्या गरेको कृष्ण बहादुर सार्कीको दाबी छ । बावु कृष्णबहादुरले भने,‘विद्यालयलाई दुई हजार एक सय शुल्क तिरेर प्रवेशपत्र लिनुपर्ने थियो । दैनिक ज्याला–मजदुरी गरेर गुजारा चलाउँदै आएकाले समयमा पैसा तिर्न सकेका थिएनौँ । २० वैशाखमा प्रवेशपत्र माग्न जाँदा रित्तो फर्काएछन् । २० वैशाखको त्यही राति छोरोले विष खाएछ।’

अपांगता भएर बाबु थलिएपछि भाइबहिनीसहित परिवारको जिम्मेवारी जितबहादुरकै काँधमा आएको थियो । बाबु कृष्णबहादुरका अनुसार विद्यालयलाई तिर्नुपर्ने शुल्कको व्यवस्था गर्न उनले गाउँमा चिनेजानेकासँग सापटी मागेका थिए । तर, कसैबाट सहयोग नपाएपछि विद्यालयमै कुरा गर्छु भनेर गएका थिए ।

छोराले आत्महत्या गर्नुको कारण निष्पक्ष छानबिन गर्नुपर्ने भन्दै उनले २४ वैशाखमा प्रहरीमा उजुरी दिएका छन् । दोषीमाथि कडा कारबाहीको माग गरेका छन् ।

विद्यालयका प्रधानाध्यापक बलराम इटनीले भने विद्यालय र आफ्नो कारणले जितबहादुरले आत्महत्या नगरेको दाबी गरे ।

उनका अनुसार विद्यालयले दुई लाख ९१ हजार अक्षयकोषको ब्याजबाट हरेक वर्ष विद्यार्थीलाई करिब ५० हजारजति छात्रवृत्ति दिँदै आएको छ । तर, गरिब तथा जेहेन्दार विद्यार्थीलाई दिइने छात्रवृत्तिमा जितबहादुरको नाम छैन ।

जिल्ला प्रहरी कार्यालय धादिङका प्रमुख एसपी गौतम मिश्रले घटनाको अनुसन्धान भइरहेको बताए ।