पोखरामा गर्ने भनिएको सात वटा प्रदेशका मुख्यमन्त्रीहरुको सम्मेलन स्थगित

पोखरामा हुने भनिएका सात वटै प्रदेशका मुख्यमन्त्रीहरुको सम्मेलन तत्कालका लागि स्थगित भएको छ ।

मुख्यमन्त्री तथा मन्त्रिपरिषद्को कार्यालय, गण्डकीको आयोजनामा पोखरामा बुधबार हुने तय भएको सातै प्रदेशका मुख्यमन्त्रीको बैठक हाललाई स्थगित भएको गण्डकी प्रदेशका मुख्यमन्त्री सुरेन्द्रराज पाण्डेका प्रेस संयोजक नरहरि सपकोटाले जानकारी गराए ।

उनले मंगलबार एक विज्ञप्ति नै जारी गर्दै भोलि हुने सम्मेलन स्थगित भएको जानकारी गराएका हुन् । उनले मुख्यमन्त्रीहरुको भेला स्थगित हुनुको कारण भने खुलाएका छैनन् ।

कुन प्रदेशले के काम गरिरहेका छन् ?, प्रदेशले गरेका कार्य तथा अनुभव साटफेर गर्न र सबै प्रदेशको साझा धारणा बनाउन सम्मेलन गर्ने तयारी थियो ।

यसका साथै संविधानले दिएका अधिकारसमेत केन्द्र सरकारले आफै राखिरहेको विषयमा समेत प्रधानमन्त्री प्रचण्डको ध्यानाकर्षण गराइने बताइएको थियो । भेलालाई प्रधानमन्त्री प्रचण्डले नै सम्बोधन गर्ने कार्यक्रम थियो ।

यसअघि गण्डकी प्रदेशका संस्थापक मुख्यमन्त्रीले तत्कालिन अवस्थामा सात वटै प्रदेशका मुख्यमन्त्रीको भेला पोखरामा गरेर केन्द्र सरकारलाई अधिकारका लागि लविङ गरेका थिए ।