सुनैसुन लगाएको तस्वीर ट्रोल गर्नेलाई केपी ओलीको जवाफः मलाइ जीवनमै सुनको मोह छैन

नेकपा एमालेका अध्यक्ष केपी शर्मा ओलीले सामाजिक सञ्जालमा आफ्नो सुनैसुनले ढाकिएको फोटो राख्दै ट्रोल गरिएकोमा गुनासो गरेका छन् ।

संसदमा पशुपतिनाथमा जलहरी चढाउँदा भ्रष्टाचार भएको विषय उठेपछि सामाजिक सञ्जालमा ओलीको एक ट्रोल तस्वीर भाइरल भएको थियो ।

बुधबार काठमाडौंमा एमालेले आयोजना गरेको कार्यक्रममा ओलीले आफ्नो ट्रोल तस्वीरबारे प्रतिक्रिया दिए । उनले भने, ‘मलाई बोक्न नसक्ने गरी सुन लगाइदिएका छन् । यति साह्रो झूट पनि यत्रो मेहनत गरेर । एउटा चिजलाई अर्को ठाउँमा लगेर । कस्तो नियत, कस्तो घटिया कुरा होला ?’

उनले आफूलाई जीवनभर सुनप्रति रुची नभएको बताए। उनले जीवनमा एकपटक आमाको सुनको औँठी लगाएको र त्यसबाहेक औँठी पनि नलगाएको बताएका छन् । उनले अहिले नेपालमा छाडापन बढेर गएको बताए ।

प्रधानमन्त्री हुँदा पशुपतिनाथमा सुनको जलहरी बनाउन लगाउँदा करिब ११ केजी सुन हराएको भन्दै ओलीको सामाजिक सञ्जालमा ट्रोल भएको थियो ।

ओलीको तस्वीरमा सुनैसुन ढाकिएको फोटो बनाएर भाइरल गरिएको छ ।