माछामार्ने क्रममा युवकको मृत्यु भएपछि संगै गएका तीन जनाविरुद्ध ज्यान मुद्धा

करेन्ट लगाएर माछामार्ने क्रममा एक युवकको मृत्यु भएपछि संगै गएका तीन जनाविरुद्ध ज्यान मुद्धा दर्ता भएको छ ।

तनहुँमा गत आइतबार म्याग्दे गाउँपालिका–६ अकलास्थित म्याग्दे खोलामा साथीहरुसित करेन्ट लगाएर माछा मार्ने क्रममा म्याग्दे–६ का २१ वर्षीय विमल थापाको मृत्यु भएपछि संगै माछामर्न गएका तीन युवकविरुद्ध ज्यान कसुरसम्बन्धी मुद्दा दर्ता गरिएको छ।

म्याग्दे गाउँपालिका–६ का २५ वर्षीय प्रेमबहादुर कुमाल र २८ वर्षीय सन्तोष थापा तथा म्याग्दे–३ का २६ वर्षीय शुसन रानाविरुद्व मुद्दा दर्ता गरिएको हो ।

थापाको मृत्यु भएपछि सोही दिन प्रहरीले तीनै युवकलाई पक्राउ गरेको थियो । पक्राउ गरिएका तीनै जनालाई तनहुँ जिल्ला अदालतमा उपस्थित गराई १० दिनको म्याद थप अनुमति लिई अनुसन्धान अघि बढाइएको प्रहरीले जनाएको छ।