पोखरा स्वास्थ्य विज्ञान प्रतिष्ठानमा थप दुई जनाको मिर्गौला प्रत्यारोपण

पोखरा स्वास्थ्य विज्ञान प्रतिष्ठानमा थप दुई जनाको मिर्गौला प्रत्यारोपण गरिएको छ ।

गत बर्ष असार ९ गते पहिलो पटक मृगौंला प्रत्यारोपण गरिएको पतिस्ठानमा यस अघि पनि प्रत्यारोपण गरिएको थियो । आइतबार तनहुँ व्यासका २५ वर्षीया पुनम थापा मगरको मिर्गौला प्रत्यारोपण गरिएको हो । उनलाई ४९ वर्षीय बुवा राजु थापामगरले मिर्गौला दान गरे ।

यस्तै पर्वत मोदी–४ का २७ वर्षीय गमबहादुर मगरको पनि आइतबार नै मिर्गौला प्रत्यारोपण गरिएको हो । मगरलाई उनका ५२ वर्षीय बुवा हेमन्त पुनले मिर्गौला दान गरेका थिए ।

प्रत्यारोपण गरिएका दुवै जनाको स्वास्थ्य अवस्था सामान्य रहेको अस्पतालले जनाएको छ ।सहिद धर्मभक्त राष्ट्रिय प्रत्यारोपण केन्द्र, भक्तपुरको प्राविधिक सहयोगमा हालसम्म पोखरामा आठ जनाको मिर्गौला प्रत्यारोपण गरिएको छ ।

मिर्गौला प्रत्यारोपणमा राष्ट्रिय प्रत्यारोपण केन्द्रको तर्फबाट कार्यकारी निर्देशक एवं कलेजो र मिर्गौला प्रत्यारोपण विशेषज्ञ डा पुकारचन्द्र श्रेष्ठ, डा दिपेश श्रेष्ठ, डा हरिप्रसाद बराल र ओटी नर्स अनिता घजु सहभागी थिए ।

पोखरा स्वास्थ्य विज्ञान प्रतिष्ठानको तर्फबाट शल्य चिकित्सक डा.प्रकाश क्षेत्री, डा.अनुप चापागाई, एनेस्थेसियोलोजिष्ट डा.रोहीनी सिग्देल, डा.माया लामा, नेफ्रोलोजिष्ट डा.जुजु राज श्रेष्ठ, डा.अमृत केसी र ओटी इन्चार्ज कविता पौडेल सहितको टोली संलग्न रहेका थिए ।