पोखरा महानगरले फोहोर पुर्ने एक्साभेटरको भुक्तानी नदिइपछि बजारमा फोहर थुप्रियो

पोखरामा ल्यान्डफिल साइटमा फोहोर पुर्न महानगरले भाडामा लिएको एक्साभेटरको इन्धन मूल्य नपाएपछि तीन दिन देखि फोहोर उठेको छैन ।

नगर क्षेत्रमा ३ दिनदेखि फोहोर नउठेपछि पोखराका बजार क्षेत्रमा दुर्गन्धित भएको छ । मुख्य चोकचोकमा फोहका डंगुर थुप्रिएर दुर्गन्धित भएको छ ।

इन्धन नपाएको बहानामा शुक्रबारदेखि फोहोर नउठेको पोखरा महानगरको सरसफाइ शाखाले जनाएको छ ।

महानगरले गत फागुन १५ देखि वैशाख १५ सम्मको रकम भुक्तानी गर्न बाँकी रहेको शाखा प्रमुख कल्पना बरालले बताइन ।

महानगरले एक्साभेटरको मासिक ४ लाख रूपैयाँ भाडा तिर्ने र इन्धन घण्टाको आधारमा दिने सम्झौता भएको थियो । तर, महानगरले विभिन्न बहानामा दुई महिनाको इन्धनको भुक्तानी रोकेपछि सरसफाइका ठेकेदारले उठाउन रोकेका हुन ।

लामेआहालका बुद्धिमान गुरुङको एक्साभेटर भाडामा लिएर महानगरले फोहोर पुर्दै आइरहेको थियो ।

गत पुसदेखि महानगरपालिकाको फोहोर पोखरा महानगरपालिका–३२ लामेआहालस्थित सेती नदी किनारमा रहेको अस्थायी ल्यान्डफिल साइटमा फोहोरमैला व्यवस्थापन हुँदै आइरहेको छ ।