बोराभित्र मृत फेला परेकी महिलाको सनाखत, हत्याको आशंकामा एक पक्राउ

चिहानडाँडा नजिकको नालामा बोराभित्र मृत फेला परेकी महिलाको सनाखत भएको छ ।

मङ्गलबार बिहान तनहुँको व्यास नगरपालिका–४ स्थित चिहानडाँडास्थित सुवर्ण कच्ची सडकको कुनामा रहेको ढलको पानीका लागि बिछ्याइएको ह्युमपाइपमा बोराभित्र फेलापरेकी अन्दाजी २५–३० वर्षीया महिलाको सनाखत भएको हो ।

मृतक महिला व्यास नगरपालिका–१४ छाब्दी निवासी रहेको रहेको खुलेपनि अनुसन्धान प्रक्रियाका कारण मृतक महिलाको नाम र पक्राउ परेका व्यक्तिको नाम अहिले सार्वजनिक नगरिएको जिल्ला प्रहरी कार्यालय तनहुँले जनाएको छ ।

उक्त घटनामा प्रहरीले एक जनालाई पक्राउ गरी अनुसन्धान गरिरहेको प्रहरीले जनाएको छ । बोराभित्र हात बाँधिएको अवस्थामा ती महिला मृतावस्थामा फेला परेकी थिइन् ।

बाटो हिड्ने क्रममा स्थानीयले गन्ध आएपछि प्रहरीलाई खबर गरेका थिए ।