पोखरा –३३ का वडाध्यक्ष अधिकारीले जरिवानासहित ५५ लाख गरे फिर्ता

पोखरा महानगरपालिका–३३ का वडाध्यक्ष रामचन्द्र अधिकारीले लगेको ५५ लाख रुपैयाँ जरिवानासहित फिर्ता गरेका छन्।

अधिकारीले मंगलबार महानगरपालिका गएर आफ्नो व्यक्तिगत खातामा लगेको ५५ लाख रुपैयाँ र जरिवाना स्वरूप २ लाख ४० हजार पनि उनले तिरेका छन्।

पोखरा महानगरले बनाउने भनेको प्रशोधन केन्द्रको जग्गा खरिद गर्न बैना दिने भन्दै महानगरले वडाध्यक्ष अधिकारीको खातामा ५५ लाख रुपैयाँ पठाएको थियो।

महानगरको गत पुस २५ गते बसेको कार्यपालिका बैठकको १३ नम्बर निर्णयले वडाध्यक्ष अधिकारीको खातामा उक्त रकम पठाउने निर्णय गरेको थियो।

वडाध्यक्ष अधिकारीको एनआइसी एसिया बैंकको खातामा महानगरको खाताबाट गत पुस २९ गते रकम पठाएको थियो।