उपभोक्ता समिति अध्यक्ष कुटेको आरोप लागेका माछापुच्छ्रे ८ का वडाध्यक्ष धरौटीमा रिहा

उपभोक्ता समिति अध्यक्ष अमृत भण्डारीमाथि कुटपिट गरेको आरोपमा पक्राउ परेका माछापुच्छ्रे गाउँपालिका ८ का वडा अध्यक्ष राम गुरुङ रिहा भएका छन् ।

समयमै काम नसकेको भन्दै खोराको मुख–उपल्लो इदिखोला माछापुच्छ्रे सडक निर्माण उपभोक्ता समितिका अध्यक्ष भण्डारीमाथि हातपात गरेको आरोपमा पक्राउ परेका माछापुच्छ्रे ८ का वडा अध्यक्ष गुरुङ ४ हजार रुपैयाँ धरौटी बुझाएर रिहा भएको जिल्ला प्रहरी कार्यालय कास्की प्रवक्ता डीएसपी श्रवणकुमार बिकले जानकारी दिए ।

उक्त घटनाको विरोधमा एमालेले वडा कार्यालयमा तालाबन्दी गरेको थियो । त्यसपछि वडाध्यक्ष गुरुङ आफैं प्रहरीमा हाजिर भएका थिए ।

माछापुच्छ्रे गाउँपालिका वडा नं. ७ र ८ वडा जोड्ने गरी बनेको उक्त बाटो स्तरोन्नति गर्न पूर्वाधार विकास कार्यक्रमअन्तर्गत २१ लाख ५४ हजार रुपैयाँ बजेट बिनियोजन भएपछि त्यस सडक स्तरोन्नति गर्न भण्डारी गत चैत १४ गते अध्यक्ष चुनिएका थिए ।