१ हजार ५ सय जनाको उजुरीपछि ढोरपाटनका मेयर नेपालीविरुद्ध ‘रेडकर्नर नोटिस’ जारी

डेढ अर्ब भन्दा बढी सहकारीका वचतकर्ताको रकम लिई फरार भएका ढोरपाटन नगरपालिकाका नगरप्रमुख देवकुमार नेपालीविरुद्ध रेडकर्नर नोटिस जारी भएको छ।

खोजविन गर्दा पनि उनी पक्राउ नपरेपछि रेडकर्नर नोटिस जारी गरिएको जिल्ला प्रहरी कार्यालय बागलुङका डिएसपी मदन केसीले वताए ।

विदेशमा लुकेर वसेको आशंकामा प्रहरी प्रधान कार्यालय इन्टरपोल महाशाखाले रेडकर्नर नोटिस जारी गरेको हो ।अब विश्वभर इन्नटरपोलमा आवद्ध देशहरुका सुरक्षाकर्मीको सहयोगमा पक्राउ गरिनेछ।

इमेज बचत तथा ऋण सहकारी संस्थाका अध्यक्ष समेत रहेका मेयर नेपाली जेठ ५ गतेदेखि सम्पर्कविहीन भएका थिए । बागलुङमा मुख्य कार्यालय र पोखरामा शाखा सञ्चालन गरी मेयर नेपालीले बचतकर्ताको रकम लिएर फरार भएका हुन् ।

मेयर नेपाली फरार भएपछि उजुरी आह्वान गरिएको थियो। मेयर नेपाली लगायत सहकारी सञ्चालकविरुद्ध १ हजार ४८१ जनाले उजुरी दिएका छन्।

बागलुङमा मात्रै सहकारीले ८ सय सेयर सदस्य र ३ हजार २ सय जना बचतकर्ताको डेढ अर्ब बढी रुपैयाँ बचत अपचलन गरेको प्रारम्भिक छानबिनले देखाएको छ।

मेयर नेपालीसहित ११ जना सञ्चालकविरुद्ध २५ असारमा बागलुङ जिल्ला अदालतमा मुद्दा दर्ता गरिएको छ ।