पोखराको मणिपाल अस्पतालमा होहल्ला गरेको आरोपमा पक्राउ परेका डा.विक रिहा

पोखराको मणिपाल शिक्षण अस्पतालमा होहल्ला गरेको भन्दै पक्राउ परेका डा.दिनेश कुमार विक रिहा भएका छन्।

सोमबार लमजुङको सुन्दरबजार –६ की ५७ वर्षीय सुकमाया दुरालाई श्वासप्रश्वास तथा ढाड दुख्ने समस्या सम्बन्धी बिरामी भई मणिपाल शिक्षण अस्पताल ल्याइएकोमा उनको उपचारका क्रममा मृत्यु भएपछि आफन्तहरूले उपचारमा चिकित्सकको लापरबाहीका कारण मृत्यु भएको भन्दै मृतक पक्ष र चिकित्सक पक्ष बिच विवाद सृजना भई होहल्ला सहित नाराबाजी भएको थियो ।

सोही क्रममा चिकित्सकको पक्षबाट होहल्ला तथा नाराबाजीमा संलग्न डा. विकलाई समेत प्रहरीले नियन्त्रणमा लिएर जिल्ला प्रहरी कार्यालयमा राखेको थियो।

उनलाई मङ्गलवार बिहान पोखरा स्वास्थ्य विज्ञान प्रतिष्ठानका सिनेटर डा. मीन बहादुर गुरुङको रोहबरमा डा.गिरधारी शर्माको जिम्मा लगाई छाडिएको छ।

मृतकको उपचारमा संलग्न रहेका चिकित्सकलाई कुटपिटमा संलग्न पोखरा –५ मालेपाटन बस्ने ३४ वर्षीय विनय गुरुङलाई नियन्त्रणमा लिइएको थियो।

गुरुङलाई स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ कसुरमा थप अनुसन्धान भइरहेको प्रहरीले बताएको छ।

उपचारका क्रममा बिरामीको मृत्यु भएपछि आफन्तजन आक्रोशित बनेका थिए। उनीहरूले उपचारका क्रममा बिरामीको अवस्थाबारे कुनै जानकारी नदिइएको र अस्पतालकै लापरबाहीका कारण मृत्यु भएको आरोप लगाएका छन्।