पोखराको होटलमा अचेत भेटिएकी महिलाको मृत्यु, अनुसन्धानका लागि ५ जना नियन्त्रणमा

पोखराको एक होटलमा अचेत अवस्थामा भेटिएकी महिलाको मृत्यु भएको छ ।

मंगलबार बेलुकी पोखरा- ८ मा नागढुङ्गामा रहेको युनिक होटलमा अचेत भेटिएकी तनहुँको भीमादकी ३८ वर्षीया सुकु विकलाई उपचारका लागि चरक मेमोरियल अस्पताल लगिएको थियो ।

उपचारका क्रममा विकको मंगलबार राति नै मृत्यु भएको जिल्ला प्रहरी कार्यालय कास्कीका प्रहरी नायब उपरीक्षक प्रवक्ता श्रवणकुमार विकले जानकारी दिए ।

उनले घटना शङ्कास्पद भएका कारण घटनामा संलग्न रहेको आरोपमा प्रहरीले ५ जनालाई प्रहरीले नियन्त्रणमा लिएको छ ।

विकले नागढुंगास्थित शिला रेष्टुरेन्टमा दुई वर्षदेखि काम गर्दै आएकी थिइन् । घटनामा संलग्न युवकको पहिचान भई सकेको प्रहरीको भनाई छ ।

मृत सुकु विकले नै फोन गरेर होटलको कोठा बुक गरेको प्रारम्भिक अनुसन्धानको क्रममा खुलेको छ । शवको पोष्टमर्टमको लागि पश्चिम क्षेत्रीय अस्पतालमा राखिएको छ ।

अनुसन्धान भइरहेको र पोष्टमार्टम रिपोर्टपछि धेरै कुरा खुल्ने प्रहरीको भनाई छ ।