पर्वतका क्षेत्रीको पोर्चुगलमा छुरा प्रहार गरी हत्या

रोजगारीको सिलसिलामा पोर्चुगलमा रहेका पर्वतको कुश्मा नगरपालिका १३ खौलाका ३६ वर्षीय धनबहादुर क्षेत्रीको उपचारको क्रममा मृत्यु भएको छ ।

रोजगारीका लागि करिब ६ महिना अगाडि पोर्चुगल पुगेका उनलाई एउटै कोठामा बस्दै आएका ‘रुम पार्टनर’ स्याङ्जाको पुतलीबजार नगरपालिका १२ पेल्काचौरका ३० वर्षीय लोकेन्द्र गुरुङले छुरा प्रहार गरेका थिए ।

क्षेत्री गत कार्तिक २९ गते नेपालमा तिहार मनाइरहेको दिनमा सामान्य भनाभनकै क्रममा छुरा प्रहार प्रहारबाट घाइते भएका थिए ।

हाल पोर्चुगलमा नै रहेर घटनाका बारेमा सामाजिक सञ्जाल फेसबुकमा राखेका रमेशराज बास्तोलाका अनुसार उपचारकै क्रममा धनबहादुरको बिहिबार मृत्यु भएको छ ।

धनबहादुर करिब डेढ वर्ष अगाडि घरबाट क्रोएसिया पुगेका थिए । त्यहाँबाट करिब ६ महिना अगाडि पोर्चुगल पुगेका थिए । सामान्य परिवारका क्षेत्रीका ३ छोरा र १ छोरी रहेका छन् ।