पोखरामा ज्यान मार्ने धम्की दिएर ५ करोड फिरौती माग्ने २ जना पक्राउ

पोखरामा ज्यान मार्ने धम्की दिएर ५ करोड फिरौती माग्ने २ जनालाई प्रहरीले पक्राउ गरेको छ।

पक्राउ पर्नेमा पर्वतको कुश्मा नगरपालिका–२ खुर्कोटका लक्ष्मण दर्जी र कुश्मा–१४ का दीपकबहादुर क्षेत्री छन्। उनीहरू दुबै जना पोखरा–८ सिमलचौरबाट बुधबार पक्राउ गरिएको हो ।

उनीहरूले पोखरा–१६ लामाचौरका सच्चाई सेवा केन्द्र संचालक तथा सच्चाई केन्द्र नेपालका अध्यक्ष प्रकाशदीप गैरेलाई ज्यान मार्ने धम्की दिएर ५ करोड फिरौती माग गरेको प्रहरीले जनाएको छ।

पक्राउ परेका दर्जी र क्षेत्रीका साथबाट भारतीय सिमकार्ड १ थान, नेपालको एनसेलको सिमकार्ड ३ थान, एनटिसीको सिमकार्ड ५ थान र मोबाइल ४ सेट पनि बरामद गरेको छ।

अभियुक्तद्वयबाट ५ सय ७२ ग्राम गाँजा, भरुवा बन्दुकमा लाग्ने केप २७ थान लगायत पनि बरामद गरेको प्रहरीले जनाएको छ ।

पक्राउ परेका दर्जी र क्षेत्री गैरेका बारेमा बुझ्न माघ १३ गते सच्चाई केन्द्र गएर गैरेको फोन नम्बर पत्ता लगाएका थिए।

प्रहरीको प्रारम्भिक अनुसन्धान अनुसार दर्जी र क्षेत्रीले माघ १८ गते पहिलो पटक फोन र म्यासेजमार्फत धम्की दिएर ५ करोड माग गरेका थिए।