पोखरामा ६ किलो सुन, चाँदी र ६३ लाख रूपैयाँ नगदसहित एक जना पक्राउ

पोखरामा ६ किलो सुन चाँदी र ६३ लाख रूपैयाँ नगदसहित एक जना पक्राउ परेका छन्।

प्रहरीले पोखराको मोहरिया बस्ने भारतीय नागरिक सुरजित भौमिकलाई सुन चाँदी र नगदसहित पक्राउ गरेको हो। भारत पश्चिम बंगाल मेदिनिपुर दासपुर-११ घर भई पोखरामा भाडामा बस्दै आएका ४० वर्षीय सुरजितले अवैध रूपमा सुन ल्याएको सूचना जिल्ला प्रहरी कार्यालय कास्कीले पाएको थियो।

प्रहरी टोलीले सुरजितको कोठामा छापा मारेर लुकाएर राखेका सुनचाँदी तथा नगद बरामद गरेको कार्यालयका प्रमुख एसपी मोहन थापाले जानकारी दिए।

उनको कोठामा फेला परेका गहना र नगदको स्रोत खुलाउन नसकेपछि प्रहरीले उनलाई पक्राउ गरेको हो। सुरजितबाट सुनका गहना, काँचो सुन, सुनको बिस्कुट गरी जम्मा ६ किलो ६९ ग्राम सुन,६ किलो चाँदी र ६२ लाख ८१ हजार रूपैयाँ नगद पनि बरामद भएको छ।

त्यस्तै एउटा मोबाइल, आधारकार्ड, १३ वटा चेक, दुई वटा डायरी र ७ वटा रजिस्टरहरू बरामद भएका छन्।