पोखरामा होटल मिलाइ दिने भन्दै पर्यटकको झोला तान्ने ९ जना पक्राउ

पोखरामा पर्यटकलाई दुःख दिएको आरोपमा प्रहरीले ९ जनालाइ पक्राउ गरेको छ।

उनीहरुले पोखराका विभिन्न ठाउँमा पाहुनालाइ दुख दिने झोला तान्ने लगायतका कार्य गरेको आरोपमा पक्राउ गरिएको हो। उनीहरूलाई पृथ्वीचोक र मुस्ताङचोकबाट पक्राउ गरिएको जिल्ला प्रहरी कार्यलय कास्कीले जनाएको छ ।

पर्यटकलाई जबरजस्ती बाटो छेक्ने, राम्रो होटल मिलाइदिन्छु भनी झोलाहरू तान्ने तथा पैसाको बार्गेनिङ गरेर अनावश्यक दुख दिएको आरोपमा उनीहरूलाई पक्राउ गरिएको प्रहरीले जनाएको छ ।

पक्राउ पर्नेहरूमा पोखरा ९ बसपार्क बस्ने ४० वर्षका रुपेन्द्र श्रेष्ठ, ३२ वर्षका मोहन आचार्य, ४० वर्षका नारायण अधिकारी, ४४ वर्षका श्याम प्रसाद शर्मा, २५ वर्षका विकास कुँवर, २१ वर्षका विमल ठकुरी र २१ वर्षका विकास श्रेष्ठ छन् । यस्तै, पोखरा १३ पाटनबेसी बस्ने वर्ष २८ का रञ्जन खड्का र १९ वर्षका सविन नेपाली पनि पक्राउ परेका छन् ।

पक्राउ परेका सबैलाई सार्वजनिक हित, स्वास्थ्य सुरक्षा सुविधा र नैतिकता विरुद्धको मुद्दामा ५ दिन म्याद थपेर अनुसन्धान भइरहेको प्रहरीले जनाएको छ। ।