कलेजका विद्यार्थी लिएर गएको बस दुर्घटना, २१ घाइते

कलेजका विद्यार्थी लिएर काठमाडौँबाट मुक्तिनाथ दर्शन गर्न मुस्ताङ गएको बस मुस्ताङको वारागुङ मुक्तिक्षेत्र कागबेनीमा दुर्घटना हुँदा २१ जना घाइते भएका छन् ।

प्रदेश-३-०१-००६ ख ६२२ नम्बरको यात्रुबाहक बस मुक्तिनाथबाट जोमसोम फर्किने क्रममा मंगलबार कागबेनीमा दुर्घटना भएको थियो ।

जिल्ला प्रहरी कार्यालय मुस्ताङले सडकको घुम्तीको ओरालोमा दुर्घटनामा परेको बसमा सवारमध्ये १४ जना पुरुष र सात महिला घाइते भएको जनाएको छ ।

बसमा चालकसहित ३० जना सवार रहेका थिए । दुर्घटनामा परेर घाइते भएकालाई स्थानीयबासी, जनप्रतिनिधि र प्रहरीले उद्धार गरी मुस्ताङ जिल्ला अस्पताल पुर्याएका छन् ।

घाइतेहरुको उपचार भइरहेको र अवस्था सबैको सामान्य रहेको छ । बसको ब्रेकफेल भएपछि बिच सडकमा नै बस पल्टिएर दुर्घटना भएको प्रहरीले जनाएको छ । बस पल्टिएपछि करिब तीन घण्टा कागबेनी-मुक्तिनाथ सडक अवरुद्ध भएको थियो ।