आज आमाको मुख हेर्ने दिन, अर्थात मातातिर्थ अ‍ैंसी

आज आमाको मुख हेर्ने दिन, अर्थात मातातीर्थ औंसी। छोराछोरीले आमालाई मनपर्ने विभिन्न खानेकुरा, लत्ताकपडालगायतका वस्तु दिँदै आमाको मुख हेर्ने दिन मनाउँदै छन्। हरेक वर्षको वैशाख कृष्ण औंसीका दिन मनाइने यस पर्वलाई मातातीर्थ औंसीका रूपमा लिने गरिन्छ।

आमालाई माता, जननी, महतारी आदि शब्दले पनि चिनिन्छ। हरेक आमा माया ममता र स्नेहकी खानी हुन्। त्यसैले आमालाई यस दिन मात्रै होइन ३६५ दिन नै माया ममता र स्नेह दिनुपर्नेमा शास्त्रका जानकारको जोड छ।

आफ्नी जन्म दिने आमालाई श्रद्धा भक्तिपूर्वक स्नेह र सम्मान गरी विभिन्न खानेकुराका परिकार खुवाउने हुनाले कसैकसैले यसलाई आमालाई खुवाउने औंसीका रूपमा पनि लिने गरेका छन्। यो दिनलाई अर्को शब्दमा मातृऔंसी, मातृदिवस, मातातीर्थ औंसी आदि पनि भनिन्छ।

पछिल्ला पिँढीलाई संसार देखाउने भएकाले आमाको महत्त्व धर्म संस्कृतिमा मात्र नभई आधुनिक समाजमा असाध्यै बढी छ। गलत बाटोमा लाग्न नदिन सुझाव दिने, सहयोग गर्ने, खुसीमा साथ दिने, दुःखमा पनि साथ दिएर त्यसबाट बाहिर निस्कन मद्दत गर्नेलगायतका काममा पछिल्लो समय आमाको भूमिका रहन्छ।

तर पछिल्लो समय आफ्नी आमालाई तिरस्कार गर्ने, आमाको मूल्यलाई महत्त्व नदिने, घरबाट निस्कन बाध्य पार्नेलगायतका क्रियाकलाप पनि भइरहेका छन्।’ सडक पेटीमा भेटिने ज्येष्ठ नागरिकमा कति जना कसैका आमा पनि भेटिन्छन्। तर, उनीहरूका सन्तानले जानाजान या कोही अन्जानमा त्यहाँ पुगेका छन्।