गण्डकी प्रदेशको बजेट ३२ अर्ब १३ करोड (वक्तव्यको पूर्ण पाठ)

पोखरा । गण्डकी प्रदेशले आगामी आर्थिक वर्ष २०७६। ०७७ का लागि बजेट विनियोजन गरेको छ। गण्डकी प्रदेशका आर्थिक मामिला तथा योजनामन्त्री किरण गुरुङले ३२ अर्ब १३ करोड ४७ लाखको बजेट आइतबार प्रदेश सभामा प्रस्तुत गरेका हुन् ।

आर्थिक मामिला तथा योजनामन्त्री किरण गुरुङले चालुतर्फ १२ अर्ब २८ करोड ५७ लाख ७२ हजार, पुँजीगततर्फ १९ अर्ब ८४ करोड ९० लाख २० हजार विनियोजन गरिएको जानकारी दिए। ६२ प्रतिशत पुँजीगत, ३८ प्रतिशत चालु खर्च हुने गरी बजेटको बाँडफाँट गरिएको छ।

गण्डकी प्रदेशले निर्वाचन क्षेत्र विकाषका लागि प्रत्यक्ष निर्वाचित सांसदलाई २ करोड रुपैयाँ उपलब्ध गराउने भएको छ।सरकारले आगामी आर्थिक बर्षको बजेटमा प्रदेशका ३६ निर्वाचन क्षेत्रका सांसदलाई २ करोडका दरले निर्वाचन क्षेत्र पूर्वाधार विकास कार्यक्रमका लागि ७२ करोड विनियोजन गरेको हो। बजेट वक्तव्यमा समानुपातिक सांसदका लागि उल्लेख गरिएको छैन।

आगामी आर्थिक बर्षका लागि अनुमान गरिएको खर्च व्योहोर्ने स्रोतमध्ये नेपाल सरकारबाट प्राप्त हुने समानीकरण अनुदान ७ अर्ब ११ करोड २२ लाख, सर्शत अनुदान ५ अर्ब ३५ करोड १६ लाख, समपूरक अनुदान ७५ करोड, बिशेष अनुदान ७५ करोड रुपैयाँ रहेको छ।

त्यसैगरी राजस्व बाँडफाँडबाट प्राप्त हुने ७ अर्ब ७० करोड ५१ लख, रोयल्टि बपत प्राप्त हुने ४० करोड र आन्तरिक राजस्वबाट ३ अर्ब २७ करोड ७५ लाख तथा चालू आर्थिक बर्षबाट खर्च नभई बाँकी रहन जाने अनुमानित ४ अर्ब ८० करोड रुपैयाँ रहेको छ ।

आन्तरिक ऋणबाट अपुग हुने १ अर्ब नेपाल सरकारबाट ऋण लिइने अर्थमन्त्री गुरुङले जानकारी दिए। सरकारले समृद्ध प्रदेश निर्माणका आधारहरुमा पर्यटन, उर्जा, कृषि, उद्योग, पूर्वाधार, सिर्जनशिल मानव पुँजी निर्माण तथा विकास र सुशासन भएको उल्लेख गरेको छ ।

सरकारले प्रदेशका गौरवका आयोजनाका रुपमा प्राथमिकीकरण गरेको पोखरा चक्रपथ र पोखरा भिमाद, दुम्कीवास द्रुतमार्ग निर्माण, शालिग्राम सांस्कृतिक करिडोरलाई दुई खण्डमा निर्माण गर्ने गरी ११ करोड रुपैयाँ विनियोजन गरेको छ।

गण्डकी प्रदेश सरकारले चालु आर्थिक वर्षको जेठ मसान्तसम्म जम्मा २५ प्रतिशतमात्र बजेट खर्च गरेको छ । गत आर्थिक बर्षमा गण्डकी प्रदेश सरकारले महत्वकांक्षी योजनासहित २४ अर्बमाथिको बजेट ल्याएको थियो । त्यसमा अहिलेसम्म ६ अर्ब २४ करोड ६४ लाख रुपैयाँ मात्र खर्च भएको छ। गत आर्थिक बर्षकै बजेट खर्च गर्न नसकेको सरकारले नयाँ आर्थिक बर्षमा करिव ९ अर्ब बढीको बजेट ल्याएको हो।

कुल चालु बजेटको ३१ प्रतिशत र पुँजीगततर्फ २३ प्रतिशत बजेट खर्च भएको कोष तथा लेखा नियन्त्रकको कार्यालयको तथ्यांकमा उल्लेख छ ।२ अर्ब ५४ करोड ६१ लाख रुपैयाँ चालु र ३ अर्ब ६६ करोड रुपैयाँ पुँजीगत खर्च गर्न सफल भएको छ। २४ अर्ब बजेटमा पनि अहिलेसम्म सन्तोषजनक खर्च गर्न नसकेको सरकारले आगामी आर्थिक वर्षमा ३२ अर्बभन्दा माथिको बजेट ल्याएको छ।

बजेटवक्तव्यको पूर्ण पाठ)