गोरखामा ओडारमा १६ किलो सुन भेटियो

पोखरा। गोरखामा ठूलो परिणममा सुन फेलापरेको छ। धार्चे गाउँपालिका ३ खोर्लाबेशीको ओडारमा लुकाएर राखेको अवस्थामा प्रहरीले १६ कीलो सुन बरामद गरेको छ ।

हुल्चुकका ब्यापारी धनकमल गुरुङले ओडारमा लुकाएर राखेका १६ वटा बिस्कुट आकारको सुन बरामद गरेको जिल्ला प्रहरी कार्यलय गोरखाका प्रहरी प्रमुख एसपी ओम अधिकारीले जानकारी दिए । उक्त सुनको एउटा बिस्कूट बरावर १ हजार ग्राम तौल रहेको छ।

‘यति नै किलो छ भनेर अहिले भन्न सकिदैन, मान्छे समातेर ल्याउदैछौं, थप अनुसन्धान हुदैछ,’ एसपी अधिकारीले भने । प्रहरीका अनुसार ओढारमा ढुंगामा झोलाभित्र हाते रुमालले बेरिएको अवस्थामा बोरामा सुन राखिएको थियो ।

असार ११ गते राति खच्चडलाई सुन बोकाएर गोरखाको उत्तरी सीमानाबाट धार्चे गाउँपालिकाको माछाखोलातर्फ आउँदै गर्दा लुटेरा समूहले आक्रमण गरेको बताइएको छ। त्यसपछि धनकमल सम्पर्कविहीन भएका थिए ।

उनलाई आक्रमण गर्न खोज्ने ४ जनालाई प्रहरीले पक्राउ गरेपछि सुनकाण्डवारे रहस्य खुलेको हो । त्यसपछि प्रहरीले धनकमलको खोजी तीब्र पारे लगत्तै बुधबार काठमाडौंमा पक्राउ गरेको थियो । उनलाई पक्राउ गरेर सुन लुकाएको ठाउँमा ल्याइएको प्रहरीले जनाएको छ ।