पोखराका वडा कार्यालय चोरको निशानामा,फेरि फोडियो वडा कार्यलय

पोखरा । पोखरा महानगरपालिका वडा नं ६ को कार्यालयमा चोरी भएको छ । सोमबार राती १२ बजे चोरी भएको वडाध्यक्ष जगतबहादुर पहारीले जानकारी दिए ।

उनका अनुसार कार्यालयबाट राजस्व संकलनको तथ्यांक रहेको २ वटा कम्प्यूटर चोरी गरिएको छ । मंगलबार बिहान कर्मचारी कार्यालय पुग्दा चोरी भएको थाहा भएको थियो ।

‘सिसिटिभी फुटेज हामीले हेर्यौं, अनुहार सबै नदेखिने तरिकाले आएको रहिछ,’ वडाध्यक्ष पहारीले भने, ‘माहुरीको मह काढ्दा लगाइने कपडा लगाएर आएको देखियो ।’ अनुसन्धानका लागि सो सिसिटिभी फुटेज अहिले प्रहरीले लगेको छ ।

यसअघि पोखराका वडा नम्बर ५, १३, १४,१५ र १६ लगायतका वडा कार्यलयहरुमा चोरीका घटना भइसकेका छन । तर, प्रहरीले चोरी गर्नेको पहिचान भने गर्न सकिरहेको छैन ।