तनहुँमा टिपरको ठक्करबाट एकको मृत्यु, एक गम्भिर घाइते

व्यास नगरपालिका-४ बागभञ्ज्याङमा टिपरको ठक्करबाट एकजनाको मृत्यु भएको छ भने एकजना घाइते भएका छन्।मृत्यु हुनेमा चितवनको भरतपुर नगरपालिका-६ गीतानगरका ४६ वर्षीया अनिता पाठक रहेकी छन्।

उनको श्रीमान् ४९ वर्षीय कृष्ण पाठक घाइते भएका छन्। दमौलीबाट भोर्लेटारतर्फ जाँदै गरेको ग.१ख ८६७८ नम्बरको टिपरको ठक्करबाट घाइते भएकी अनिताको दमौली अस्पतालमा उपचारको क्रममा मृत्यु भएको जिल्ला प्रहरी कार्यालय तनहुँका प्रहरी नायव उपरीक्षक लिलाराज लामिछानेले जानकारी दिए।

उनका अनुसार टिपरको पछाडिको पाङ्ग्राले किचेको हुने सक्ने अनुमान गरिएको छ। विपरीत दिशाबाट आउँदै गरेको ना.३९प ५०० नम्बरको मोटरसाइकललाई टिपरले ठक्कर दिँदा अनिता खसेर दुर्घटना भएको हुन सक्ने प्रहरीको अनुमान छ।

श्रीमानको अवस्था सामान्य रहेको जिल्ला प्रहरी कार्यालय तनहुँले जनाएको छ। टिपर चालक प्रहरीको नियन्त्रणमा रहेको र थप अनुसन्धान भइरहेको जनाइएको छ।