प्रशासनद्धारा औषधि पसलमा अनुगमन, मास्क जफत

उद्योग, वाणिज्य तथा आपूर्ति मन्त्रालय, वाणिज्य विभाग जिल्ला बजार अनुगमन समितिले ललितपुरका औषधि पसल अनुगमन गर्दा टाइम मेडिकेयर फार्मेसीले ३० रुपैयाँ पर्ने मास्कलाई हाल १सय रुपैयाँमा बेच्ने गरेको पाइएको छ ।

सो फार्मेसीसँग खरिद बिल पनि नभएको पाइएको छ । सो पसलबाट ६ थान मास्क जफत गरिएको छ ।यसैगरी, पाटन अस्पतालनजिकै सञ्चालित जीपीपी म्यानकाइण्ड प्रालिले कपडाको मास्क साधारण खरिदको बिलसमेत पसलमा नराखेको र २५ रुपैयाँमा बेच्नुपर्नेमा ५० रुपैयाँ लिएर व्यापार गरेबापत अनुगमन समितिले २२ थान मास्क जफत गरेको छ ।

बजारमा मास्क तथा औषधिको मूल्य वृद्धि र अभाव भएसँगै उचित मूल्य निर्धारणका लागि आज १२ पसलमा अनुगमन गरिएको हो ।

जिल्ला प्रशासन कार्यालय ललितपुरका सहायक प्रमुख जिल्ला अधिकारी खेमप्रसाद भुसालले मुलुकमा कोभिड–१९ को सङ्क्रमणको जोखिम बढ्दै गएको हुँदा आगामी दिनमा सञ्चालकलाई उचित मूल्य लिन तथा सबै वस्तुको खरिदको बिल, प्यान तथा भ्याट राख्न आग्रह गरे ।

अनुगमनमा समितिमा विभागका कर्मचारी रेवती ज्ञवाली, विष्णुप्रसाद शर्मा र विकल श्रेष्ठलगायत उद्योग वाणिज्य सङ्घ ललितपुरकी गीता न्यौपाने, प्रहरी प्रभाग लगनखेलका प्रहरी सहायक निरीक्षक राम शर्मा न्यौपानेलगायत सहभागी थिए ।