पोखरा महानगरपालिकाद्धारा ३० सडक बालबालिकाको उद्धार

पोखरा महानगरपालिकाले पोखराका विभिन्न ठाउँबाट ३० जना सडक बालबालिकाको उद्धार गरेको छ।

कोरोना भाइसर संक्रमणको उच्च जोखिममा सडक बालबालिका रहेकोले उनीहरुलाई त्यसबाट जोगाउन र संक्रमणलाई फैलिन नदिनको लागि कास्की प्रहरीको सहयोगमा महानगरले उद्धार गरेको हो ।

शनिबार उद्धार गरी उनीहरुलाई अन्नपूर्ण गाउँपालिकास्थित लेबाडेमा रहेको चिल्डे«न नेपालको भवनमा राखिएको छ ।

महानगरपालिका प्रमुख मानबहादु जिसी, उपप्रमुख मञ्जुदेवी गुरुङ, प्रमुख प्रशासकीय अधिकृत धुव्रकुमार पोखरेल सहितको टोली लेबाडे नै पुगेर उनीहरुलाई त्यहाँ राख्ने व्यवस्था मिलाएको महानगरका सूचना अधिकारी भरतराज पौडेलले बताए ।

महानगरले करिब १० दिनलाई पुग्ने खाद्यान्न साथै बसोबासको लागि आवश्यक बेडको पनि व्यवस्था मिलाएको पौडेलले बताए ।
कोरोना संक्रमणबाट बचाउनको साथै उनीहरुलाई परामर्श दिएर समाजमा पुर्नस्थापित गर्ने गरी महानगरले सडक बालबालिकालाई उद्धार गरेको पोखरा महानगरपालिकाका प्रमुख मानबहादुर जिसीले बताए ।

उद्धार गरिएका बालबालिकाका अभिभावक वा आफन्तको खोजी गरी उनीहरुलाई परिवारको जिम्मा लगाउने र परिवारको पत्ता नलागेकालाई कसरी समाजमा पुर्नस्थापित गर्न सकिन्छ त्यसतर्फ महानगरले काम गर्ने जिसीको भनाइ छ । ती बालबालिकालाई नेपाल प्रहरी र नगर प्रहरीले सुरक्षा दिएका छन्

बालबालिकाको रेखदेखको लागि चिल्डे«न नेपालले पनि २ जना कर्मचारीलाई खटाएको छ । संस्थाको तर्फबाट उनीहरुलाई परामर्श दिइने चिल्डे«न नेपालका संस्थापक अध्यक्ष रामचन्द्र पौडेलले बताए ।

महानगरपालिकाले उनीहरुलाई सरसफाइको साथै स्वास्थ्य जाँचको पनि व्यवस्था मिलाउने स्वास्थ्य महाशाखाका अधिकृत फूलदेव तिमिल्सिनाले बताए ।