अर्का १ जनामा भेटियाे कोरोना संक्रमण, संक्रमितकाे संख्या ६ पुग्यो

नेपालमा कोरोना भाइरसको छैटौं संक्रमित भेटिएका छन्।

बिहीबार स्वास्थ्य मन्त्रालयको नियमित प्रेस ब्रिफिङमा स्वास्थ्य मन्त्रालयका प्रवक्ता डा‍. विकास देवकोटाले थप एक जनामा कोरोना भाइरसको संक्रमण देखिएको जानकारी दिएका हुन्।

देवकोटाका अनुसार गत चैत ४ गते कतारको दोहाबाट कतार एयरवेजको विमान क्यूआर ६५२ बाट नेपाल आएका अर्का व्यक्तिमा कोरोना पोजेटिभ देखिएको हो।

राष्ट्रिय प्रयोगशालाले कोरोना पोजेटिभ देखिएको बताएको तर थप जानकारी भने आउन बाँकी रहेको प्रवक्ता देवकोटाले बताए। योसँगै नेपालमा कोरोना भाइरसबाट संक्रमितको संख्या ६ पुगेको छ।

यसअघि कतार एयरवेजको सोही विमानबाट नेपाल आएकी काठमाडौंकी १९ वर्षीया युवतीमा र बाग्लुङकी १९ वर्षीया युवतीमा पनि कोरोना संक्रमण पुष्टि भएको थियो।

कोरोना भाइरसबाट संक्रमितमध्ये चार जनालाई आइसोलेसनमा राखेर उपचार गरिराखिएको छ भने चीनबाट आएका एक व्यक्ति निको भएर घर फर्किएका छन्।