लकडाउनमा पनि पोखरा क्षेत्रीय अन्तर्राष्ट्रिय विमानस्थलको निर्माण कार्य जारी

कोरोना भाइरस कोभिड १९ को विश्वव्यापी महामारी रोक्नका लागि नेपालमा लकडाउन गरिए पनि राष्ट्रिय गौरवको पोखरा क्षेत्रीय अन्तर्राष्ट्रिय निर्माणको काम भने निरन्तर भइरहेको छ ।

लकडाउनका कारण विमानस्थल निर्माणका लागि आवश्यक सामग्री रोकिए पनि मौज्दात रहेका सामग्रीको प्रयोग गरेर विमानस्थल निर्माणको काम निरन्तर भइरहेको हो ।

चिनियाँ कम्पनी सीएमसीले निर्माणको जिम्मा पाएको विमानस्थलमा कार्यरत कर्मचारीहरूको स्वास्थ्यमा विशेष ख्याल गर्दै निर्माणको कामलाई निरन्तरता दिइरहेको विमानस्थल आयोजनाका प्रमुख विनेश मुनकर्मीले जानकारी दिनुभयो ।

सरकारले लकडाउनको घोषणापछि १६० जना नेपाली कामदारलाई घर पठाइए पनि २७१ चिनियाँ र १०० जना नेपाली कामदारलाई विमानस्थलभित्रै लकडाउन गरेर निर्माणको कामलाई निरन्तरता दिइएको मुनकर्मीले बताए।

अन्तर्राष्ट्रिय क्षेत्रमा उडान गर्ने १६० सिट क्षमताका ‘फोरडी’ विमान अवतरण गर्नसक्ने गरी निर्माण गरिएको विमानस्थलको रनवे, ट्याक्सीवे, एप्रोन, इमिग्रेसन क्यानल, माटो काट्ने, फिलिङ गर्ने, दायाँ बायाँ मैदान बनाउने, १४ वटा बिल्डिङको स्ट्रक्चर निर्माण गरी ५६ प्रतिशत काम सकिएको र अन्य डेकोरेसनको काम बाँकी रहेको छ ।

विमानस्थलमा कार्यरत कामदार चाड मनाउनका चीन गएकै बेला कोरोना भाइरसको सङ्क्रमण देखिएपछि केही समय फिर्ता हुन नपाएका कामदार चीनमै १४ दिन क्वारेन्टाइनमा राखेर स्वस्थ रहेको प्रमाणपत्रका आधारमा काममा खटाइएको थियो ।

सरकारले घोषणा गरेको लकडाउनका कारण विमानस्थलबाहिर गर्नुपर्ने काम नभए पनि भित्र गर्नुपर्ने काम भइरहेको मुनकर्मीको भनाइ छ ।