पोखराको लामेआहालको प्रतिक्षालयमा महिलाको शव भेटियो

पोखरा लामेआहालको प्रतिक्षालयमा १ महिलाको शव फेला परेको छ ।

महिलाको पहिचान खुल्न बाँकी रहेको जिल्ला प्रहरी कार्यालय कास्की प्रवक्ता तथा डिएसपी सुवास हमालले जानकारी दिए ।

पृथ्वीराजमार्गसँग जोडिए लामेआहालको सडक किनारामा रहेको यात्रु प्रतिक्षामा अन्दाजी ४० बर्षकी महिलाको शव फेला परेको हो ।

सोमबार विहान साढे ८ बजे शव प्रतिक्षालयमा रहेको खबर प्रहरीलाई पुगेको थियो ।

घटनास्थलमा खटिएको इलाका प्रहरी कार्यालय डाँडाकोनाक टोलीले शव पोस्टमार्टमका लागि अस्पताल पठाएको छ ।

‘शव कपडाले बेरिएको अवस्थामा भेटिएको डाँडाकोनाक कार्यालयका प्रहरी प्रमुख तथा डिएसपी अर्जुन रानाभाटले जानकारी दिए ।

नाक र मुखमा रगत लतपतिएको अबस्थामा शब भेटिएको हो । पोस्टमार्टम पछि मात्र घटनाबारे थप खुल्ने रानाभाटले बताए ।

शवमा बाहिरी भागमा देखिने चोट नभएको प्रहरीले जनाएको छ।

घटनाका वारेमा आबस्यक अनुसन्धान भइरहेको जिल्ला प्रहरी कार्यलय कास्की प्रहरी प्रवक्ता डिएसपी सुवास हमालले बताए ।