ठुलो परिमाणको अवैध जडीबुटीसहित एक महिला पक्राउ

जिल्ला प्रहरी कार्यालय लमजुङले ठुलो परिमाणको अवैध जंगली जडीबुटीसहित एक महिलालाई पक्राउ गरेको छ ।

अवैध जंगली जडीबुटीसहित आइतबार लमजुङको बेसीसहर नगरपालिका–७ मा बस्दै आएकी ३८ वर्षिया सिद्धीमाया तामाङलाई प्रहरीले पक्राउ गरेको हो ।

गण्डकी प्रदेश प्रहरी कार्यालयकी प्रवक्ता एसएसपी किरण रानाका अनुसार तामाङलाई घरमा अवैध रूपमा जंगली जडीबुटी

लुकाईछिपाई राखेको भन्ने विशेष सूचनाका आधारमा खटिएको प्रहरीले तामाङको घरमा छापा मारेको थियो ।

खानतलासीका क्रममा विभिन्न प्रजातीका अवैध जंगली जडीबुटी बरामद गरेको हो।

एसएसपी रानाका अनुसार, जडीबुटी डालिङ (गुरुङ भाषामा टलिट भनिने) ४७६ किलो १ सय ग्राम, वन लसुन १ सय ५४ किलो,

कुड्की २४ किलो ६ सय ग्राम, जटामसी १४ किलो ९ सय ग्राम, सुगन्धवाल १८ किलो ३ सय ग्राम, सतुवा ४ किलो ४ सय ग्राम र

वन आलु २ किलो ८ सय ग्राम गरी जम्मा ६ सय ९५ किलो १ सय ग्राम जडीबुटी नियन्त्रणमा लिइएको हो ।

पक्राउ परेकी तामाङसहित बरामद भएका जडीबुटीलाई आवश्यक कारवाहीका लागि डिभिजन वन कार्यालय लमजुङ पठाइएको छ ।