चिकित्सा क्षेत्रको चमत्कार ; दुर्घटनामा चुँडिएको हात शल्यक्रियाबाट जोडियो

दुर्घटनामा चुँडिएको हात राष्ट्रिय ट्रमा सेन्टरमा १० घन्टा लामो शल्यक्रियापछि जोडिएको छ ।

काठमाडौंको दक्षिणकालीस्थित एक कारखानामा मेसिनले सर्लाहीका रवि सिंहको हत्केलो चुँडेको थियो । दाहिने हत्केलो पुरै छिनेकाले उनलाई आकस्मिकरुपमा राष्ट्रिय ट्रमा सेन्टर ल्याइएको थियो ।

अस्पतालका प्लाष्टिक सर्जरी विभागका प्रमुख प्रा.डा. पीयूष दाहाल, सर्जनहरु डा.कृष्ण मानन्धर, डा.अपार लामिछाने, डा.कमलराज पाठकसहितको टोलीले सिंहको हातको शल्यक्रिया गरेको थियो ।

अस्पतालका निर्देशक डा.सन्तोष पौडेलले १० घन्टासम्म लामो शल्यक्रिया गरेर सिंहको हात जोडिएको जानकारी दिए ।

२३ दिनको उपचारपछि सिंह डिस्चार्ज भएका छन् । तर, उनले फिजियोथेरापी भने गरिरहेका छन् ।

अस्पतालले हातले राम्रोसँग काम गर्ने निश्चित भएपछि २३ दिनपछि मात्रै समाचार सार्वजनिक गरेको हो ।